पुणे : बाणेर परिसरातील खेळाडूंना सर्व ऋतूंमध्ये अखंड सराव करता यावा आणि त्यांना जागतिक दर्जाच्या सुविधा मिळाव्यात, या उद्देशाने उभारण्यात येत असलेल्या रोल बॉल आणि स्केटिंग मैदानावरील शेडच्या कामाचे भूमिपूजन आज उत्साहात पार पडले. Pune Municipal Corporation आणि लोकसहभागातून साकारत असलेल्या या महत्त्वाकांक्षी प्रकल्पाची सुरुवात करण्यात आली.
रोल बॉल हा मुळात ‘इनडोअर’ क्रीडा प्रकार असल्याने उन्हाळा, पावसाळा किंवा इतर कोणत्याही हवामानात खेळाडूंचा सराव खंडित होऊ नये, यासाठी दर्जेदार आणि सुरक्षित शेडची गरज होती. नव्याने उभारण्यात येणारे हे शेड आंतरराष्ट्रीय मानकांनुसार तयार करण्यात येणार असून, प्रकाशयोजना, सुरक्षित फ्लोअरिंग आणि हवेशीर रचना यावर विशेष भर दिला जाणार आहे.
“पुण्याने देशाला रोल बॉलसारखा अनोखा खेळ दिला आहे. येथील खेळाडूंमध्ये प्रचंड क्षमता असून ते आंतरराष्ट्रीय स्तरावर शहराचे आणि देशाचे नाव उज्ज्वल करतील,” असा विश्वास व्यक्त करण्यात आला. या सुविधेमुळे स्थानिक खेळाडूंना अधिक व्यावसायिक पातळीवर प्रशिक्षण घेण्याची संधी मिळेल, तसेच राष्ट्रीय व आंतरराष्ट्रीय स्पर्धांचे आयोजन करण्यासही चालना मिळेल.
या प्रसंगी आईस स्केटिंग असोसिएशनचे राष्ट्रीय अध्यक्ष अमिताभ शर्मा, रोल बॉलचे जनक राजू दाभाडे, स्टेट प्रेसिडेंट संदीप खर्डेकर, पुणे जिल्हा अध्यक्ष गजानन थरकुडे, नगरसेविका मंजुषा खर्डेकर, मयुरी कोकाटे, रोहिणी चिमटे, अमोल बालवडकर, भाजप उत्तर मंडल अध्यक्ष सचिन पाषाणकर यांच्यासह अनेक मान्यवर आणि खेळाडू मोठ्या संख्येने उपस्थित होते.
प्रशासकीय अधिकाऱ्यांना हे काम निर्धारित वेळेत आणि उत्कृष्ट गुणवत्तेसह पूर्ण करण्याच्या सूचना देण्यात आल्या आहेत. बाणेर परिसरातील क्रीडाप्रेमी नागरिकांनी या उपक्रमाचे स्वागत करत, भविष्यात आणखी क्रीडा सुविधा उपलब्ध व्हाव्यात, अशी अपेक्षा व्यक्त केली.
या प्रकल्पामुळे बाणेर हे शहरातील क्रीडा केंद्र म्हणून अधिक बळकट होणार असून, नवोदित खेळाडूंना प्रोत्साहन देण्यासाठी हा टप्पा महत्त्वाचा मानला जात आहे.
