कल्याण लोकसभा ‘डबल डेकर कॉरिडॉर’कडे झेपावणार; खाली रस्ता, मध्ये फ्लायओव्हर आणि वर मेट्रो असा नवा वाहतूक आराखडा

कल्याण : कल्याण लोकसभा मतदारसंघातील वाहतूक कोंडीवर कायमस्वरूपी तोडगा काढण्यासाठी ‘डबल डेकर कॉरिडॉर’च्या महत्त्वाकांक्षी संकल्पनेला वेग देण्यात येत आहे. खाली सर्वसामान्यांसाठी रस्ता, त्यावर फ्लायओव्हर आणि सर्वात वर मेट्रो मार्गिका अशा त्रिस्तरीय रचनेचा नवा पॅटर्न राबविण्याबाबत महत्त्वपूर्ण बैठक Mumbai Metropolitan Region Development Authority (एमएमआरडीए) मुख्यालयात पार पडली.

या बैठकीस एमएमआरडीए आयुक्त डॉ. संजय मुखर्जी, अतिरिक्त आयुक्त अश्विन मुदगल यांच्यासह विविध महापालिकांचे आयुक्त, लोकप्रतिनिधी आणि वरिष्ठ अधिकारी उपस्थित होते. मतदारसंघातील सुरू असलेल्या आणि प्रस्तावित वाहतूक प्रकल्पांचा सविस्तर आढावा घेण्यात आला.

सर्व मेट्रो मार्गिका ‘डबल डेकर’ पद्धतीने कल्याण लोकसभा मतदारसंघातून जाणाऱ्या सर्व प्रमुख मेट्रो मार्गिका डबल डेकर स्वरूपात उभारण्याचे नियोजन आहे. यात विशेषतः

• Mumbai Metro Line 12 (कल्याण-तळोजा)

• Mumbai Metro Line 14 (कांजूरमार्ग-बदलापूर)

• Mumbai Metro Line 5 (ठाणे-भिवंडी-कल्याण)

या मार्गिकांचा समावेश आहे. तसेच दुर्गाडीमार्गे कल्याण-उल्हासनगर-अंबरनाथ-चिखलोली (५ अ) या विस्तारित मार्गिकेचेही नियोजन आहे.

या प्रकल्पांत ज्या ठिकाणी मेट्रो जाईल, त्या ठिकाणी खालच्या स्तरावर रस्ता, त्यावर उन्नतमार्ग (फ्लायओव्हर) आणि सर्वात वर मेट्रो अशी त्रिस्तरीय उभारणी होणार आहे. यामुळे जागेची बचत होऊन वाहतुकीचा वेग वाढण्यास मदत होईल.

मेट्रो विस्ताराला गती

मेट्रो ५ चे दोन टप्प्यांत विस्तारीकरण करून ५ ब (चिखलोली-बदलापूर) आणि ५ क (दुर्गाडी-टिटवाळा) मार्गिका उभारण्याचा प्रस्ताव मांडण्यात आला. त्याचप्रमाणे मेट्रो १२ चे १२ ब (शिळफाटा-मुंब्रा-कळवा-ठाणे) असे विस्तारीकरण करण्याबाबत सकारात्मक चर्चा झाली.

सध्या मेट्रो १२ चे पिलर आणि स्थानक उभारणीचे काम वेगात सुरू असून, ते अधिक जलदगतीने पूर्ण करण्याच्या सूचना देण्यात आल्या. १२ अ ला नुकतीच मंजुरी मिळाल्याने त्या कामालाही गती देण्यावर भर देण्यात आला.

एक्सेस कंट्रोल मार्गामुळे मुंबई-नवी मुंबई जोडणी सुलभ

प्रस्तावित एक्सेस कंट्रोल मार्गामुळे कल्याण पलीकडील शहरांतील नागरिकांना थेट मुंबई आणि नवी मुंबई गाठणे अधिक सोपे होणार आहे. बदलापूर, अंबरनाथ, उल्हासनगर, कल्याण, डोंबिवली या शहरांच्या पूर्व-पश्चिम भागांची सुसंगत जोडणी करण्याचे निर्देश देण्यात आले.

बदलापूर-काटई मार्गाचे रुंदीकरण, अनधिकृत बांधकामे हटविणे आणि या मार्गाची दुसऱ्या बाजूस जोडणी करण्यावरही भर देण्यात आला. याच मार्गावरून जाणाऱ्या मेट्रो १४ ला एक्सेस कंट्रोल मार्गाशी जोडण्याचीही योजना आहे.

शिळफाटा-रांजणोली ‘डबल डेकर’ रस्ता

वाहतूक ताण कमी करण्यासाठी शिळफाटा-रांजणोली दरम्यान द्विस्तरीय (डबल डेकर) रस्ता उभारण्याचा निर्णय घेण्यात आला. निविदा प्रक्रिया तातडीने राबविण्याच्या सूचना देण्यात आल्या.

कल्याण (पूर्व) यू-टाईप व श्रीमलंग रस्त्यांच्या कामाला गती देणे, भूसंपादन प्रक्रिया लवकर पूर्ण करणे, बाधित नागरिकांचे तात्पुरते स्थलांतर आणि क्लस्टर योजनेद्वारे पुनर्वसन करण्यावरही भर देण्यात आला.

काटई नाका बोगदा व इतर प्रकल्प

ऐरोली-काटई फ्रीवेवरील काटई नाका बोगद्याचे काम जलदगतीने पूर्ण करण्याच्या सूचना देण्यात आल्या. टप्पा ३ साठी आवश्यक असलेली भूसंपादन प्रक्रिया त्वरित पूर्ण करण्याचा आदेशही देण्यात आला.

या सर्व प्रकल्पांमुळे कल्याण लोकसभा मतदारसंघात वाहतुकीचा नवा पॅटर्न निर्माण होणार असून, भविष्यातील वाढती लोकसंख्या आणि वाहनसंख्या लक्षात घेता हा आराखडा महत्त्वपूर्ण ठरणार आहे.

नागरिकांचा प्रवास अधिक सुरक्षित, वेगवान आणि सुखकर करण्याच्या दृष्टीने हा ‘डबल डेकर कॉरिडॉर’ गेमचेंजर ठरेल, असा विश्वास व्यक्त करण्यात आला.