यवतमाळ : महाराष्ट्रातील यवतमाळ जिल्ह्यातील आर्णी तहसील येथे एका धक्कादायक सायबर गुन्ह्याचा पर्दाफाश झाला आहे. अवघ्या १४०० लोकसंख्या असलेल्या शेंदुरसनी गावाच्या ग्रामपंचायतीतून तब्बल २७ हजार बनावट जन्म प्रमाणपत्रे तयार केल्याचा प्रकार उघडकीस आला असून, यामुळे संपूर्ण राज्यात खळबळ उडाली आहे.
प्राथमिक माहितीनुसार, ग्रामपंचायतीच्या सिव्हिल रजिस्ट्रेशन सिस्टिमला हॅक करून एका आंतरराज्यीय सायबर टोळीने हा प्रकार घडवून आणला. या बनावट जन्म प्रमाणपत्रांचा वापर आधार कार्ड, पासपोर्ट, शासकीय योजनांचा लाभ, शिक्षण आणि नोकरीसाठी केल्याचा संशय व्यक्त केला जात आहे. त्यामुळे हा प्रकार केवळ स्थानिक नसून राष्ट्रीय सुरक्षेशी संबंधित गंभीर प्रश्न निर्माण करणारा ठरत आहे.
तपासात असे आढळून आले की, काही अधिकृत लॉग-इन आयडी आणि पासवर्डचा गैरवापर करून सिस्टिममध्ये थेट हस्तक्षेप करण्यात आला. संशयित टोळीने संगणकीय कौशल्याचा वापर करत बनावट नोंदी मोठ्या प्रमाणावर अपलोड केल्या. या प्रमाणपत्रांवर अधिकृत शिक्के व डिजिटल स्वाक्षऱाही असल्याने सुरुवातीला हा घोटाळा लक्षात आला नाही.
जिल्हा प्रशासन व सायबर पोलिसांनी संयुक्त कारवाई करत संबंधित सर्व जन्म प्रमाणपत्रांची छाननी सुरू केली असून, दोषींवर कठोर कारवाईचे संकेत दिले आहेत. या प्रकरणात स्थानिक कर्मचाऱ्यांची भूमिका आहे का, याचाही सखोल तपास केला जात आहे. दरम्यान, राज्य सरकारने सर्व ग्रामपंचायतींच्या डिजिटल सिस्टिमचे सुरक्षा ऑडिट करण्याचे आदेश दिले आहेत.
या घटनेमुळे डिजिटल प्रशासनाच्या सुरक्षेवर प्रश्नचिन्ह उपस्थित झाले असून, भविष्यात अशा प्रकारचे सायबर गुन्हे रोखण्यासाठी कडक सायबर सुरक्षा उपाय, नियमित ऑडिट आणि कर्मचाऱ्यांचे प्रशिक्षण आवश्यक असल्याचे तज्ज्ञांचे मत आहे.
