पुणे शहराला हादरवून टाकणाऱ्या एका अमानुष हत्येप्रकरणात पुणे न्यायालयाने महत्त्वाचा निकाल दिला आहे. चार वर्षांपूर्वी बिबवेवाडी परिसरात १३ वर्षीय कबड्डी खेळाडू क्रीतिजा अनंत व्यवहारे हिची निर्घृण हत्या करणाऱ्या शुभम ऊर्फ ऋषिकेश बजरंग भगवत याला न्यायालयाने सक्तमजुरीसह जन्मठेपेची शिक्षा सुनावली आहे. आरोपीने अवघ्या २२व्या वर्षी अत्यंत क्रूरतेने क्रीतिजावर तब्बल ४४ वार करून तिचा जीव घेतला होता.
पोलीस तपासानुसार, क्रीतिजा ही आरोपी शुभमची दूरची नातेवाईक होती. क्रीतिजा पुण्यातील सुपर इंदिरा नगर परिसरात वास्तव्यास होती आणि इयत्ता आठवीत शिक्षण घेत होती. तिला कबड्डीची विशेष आवड असून, ती बिबवेवाडीतील यश लॉन्स मैदानावर नियमित सरावासाठी जात असे. घटनेच्या दिवशीही ती आपल्या मैत्रिणींसोबत कबड्डी सराव करत असताना आरोपीने तिच्यावर अचानक हल्ला चढवला.
या खटल्यातील सर्वात धक्कादायक बाब म्हणजे सोशल मीडिया अ‍ॅप Snapchat. तपासात उघड झाले की, आरोपीने Snapchatवरील पोस्ट आणि संवादांच्या आधारे क्रीतिजावर संशय, राग आणि सूडाची भावना मनात बाळगली होती. या पोस्टमधूनच हळूहळू खुनाचा कट रचण्यात आला आणि अखेर त्याचा भयंकर परिणाम या निष्पाप मुलीच्या मृत्यूत झाला.
घटनेनंतर परिसरात एकच खळबळ उडाली होती. अल्पवयीन खेळाडूवर दिवसाढवळ्या करण्यात आलेल्या या हत्येमुळे पालक, क्रीडाप्रेमी आणि सर्वसामान्य नागरिकांमध्ये प्रचंड संतापाची लाट उसळली होती. पोलिसांनी तत्काळ तपास सुरू करून आरोपीला अटक केली आणि ठोस पुरावे, साक्षीदारांचे जबाब तसेच डिजिटल पुराव्यांच्या आधारे गुन्हा सिद्ध केला.
न्यायालयाने निकाल देताना म्हटले की, हा गुन्हा अत्यंत क्रूर, अमानवी आणि समाजाला हादरवणारा आहे. अल्पवयीन मुलीवर इतक्या निर्दयपणे हल्ला करणे क्षम्य नाही. त्यामुळे आरोपीस कठोरात कठोर शिक्षा देणे आवश्यक असल्याचे न्यायालयाने स्पष्ट केले. या निकालामुळे क्रीतिजाच्या कुटुंबीयांना काहीअंशी न्याय मिळाल्याची भावना व्यक्त होत असून, सोशल मीडियाच्या गैरवापरामुळे निर्माण होणाऱ्या धोक्यांवरही पुन्हा एकदा गंभीर चर्चा सुरू झाली आहे.
