पुणे : पुण्यातील गणेशोत्सव हे महाराष्ट्राच्या सांस्कृतिक ओळखीचे प्रतीक आहे. राज्य शासनाने गणेशोत्सवाला “राज्य उत्सवाचा” दर्जा दिला आहे. या पार्श्वभूमीवर मुख्यमंत्री देवेंद्र फडणवीस यांनी आज पुण्यातील मानाच्या गणपती मंडळांना भेट देऊन दर्शन घेतले आणि श्रींच्या चरणी प्रार्थना केली.
मुख्यमंत्री म्हणाले की, “श्री गणेश सर्वांना सन्मार्गाने चालण्याची प्रेरणा देवो, सुबुद्धी देवो. सर्वांच्या मनोकामना पूर्ण होवोत, आरोग्य, ऐश्वर्य आणि समाधान लाभो हीच प्रार्थना.”
मानाच्या गणपतींचे दर्शन
मुख्यमंत्र्यांनी आज कसबा गणपती, तांबडी जोगेश्वरी, गुरुजी तालीम मंडळ, श्री तुळशीबाग सार्वजनिक गणेशोत्सव मंडळ, लोकमान्य टिळक गणेशोत्सव मंडळ केसरीवाडा यांसह श्रीमंत दगडूशेठ हलवाई गणपती, साई गणेश मित्र मंडळ, साने गुरुजी तरुण मंडळ अशा मानाच्या व प्रतिष्ठित मंडळांना भेटी दिल्या. प्रत्येक मंडळात त्यांचे पारंपरिक पद्धतीने स्वागत व सत्कार करण्यात आला. यापूर्वी मुख्यमंत्र्यांनी अभिनेता नाना पाटेकर यांच्या डोणजे येथील निवासस्थानी भेट देऊन गणपतीचे दर्शन घेतले. नाना पाटेकर यांनी मुख्यमंत्र्यांचे हार्दिक स्वागत केले.
पुणेकरांच्या सोबत उत्सवी वातावरण
या भेटींमध्ये मुख्यमंत्री देवेंद्र फडणवीस सामान्य भक्तांसोबत मिसळलेले दिसले. आरतीच्या वेळी त्यांनी भक्तगणांसोबत हात जोडून श्रींचे नामस्मरण केले. पुण्यातील गणेशोत्सव हा सामाजिक, सांस्कृतिक व धार्मिक बंध एकत्र आणणारा सोहळा असल्याचेही त्यांनी यावेळी नमूद केले.
मान्यवरांची उपस्थिती
मुख्यमंत्र्यांसोबत केंद्रीय सहकार राज्यमंत्री मुरलीधर मोहोळ, आमदार हेमंत रासने, कसबा गणपतीचे अध्यक्ष श्रीकांत शेटे, तांबडी जोगेश्वरी गणपती मंडळाचे अध्यक्ष प्रसाद कुलकर्णी, गुरुजी तालीम मंडळाचे अध्यक्ष प्रवीण परदेशी, श्री तुळशीबाग मंडळाचे अध्यक्ष विकास पवार, लोकमान्य टिळक मंडळाचे उत्सवप्रमुख डॉ. रोहित टिळक, श्रीमंत दगडूशेठ हलवाई गणपती मंडळाचे अध्यक्ष सुनील रासने, तसेच अनेक मंडळांचे पदाधिकारी, विश्वस्त व कार्यकर्ते उपस्थित होते.
या भेटींमुळे पुण्याच्या गणेशोत्सवाला एक वेगळे औचित्य प्राप्त झाले असून, नागरिकांनी मुख्यमंत्र्यांच्या या सहभागाचे स्वागत केले आहे. मुख्यमंत्री देवेंद्र फडणवीस यांची पुण्यातील मानाच्या गणपतींना भेट – “श्री गणेश सुबुद्धी देवो, सन्मार्गाची प्रेरणा देवो” अशी मुख्यमंत्र्यांची प्रार्थना
