iPhone 17 च्या वेडाने ओलांडल्या साऱ्या सीमा : ॲपल स्टोअरबाहेर चाहत्यांची रात्रभर रांग, ढकलाढकलीतून हातघाई

मुंबई | प्रतिनिधी :- नवीन iPhone 17 च्या लाँचिंगने भारतात प्रचंड उत्साहाचे वातावरण निर्माण केले आहे. मुंबईतील प्रमुख ॲपल स्टोअरबाहेर रात्रीपासूनच ग्राहकांची प्रचंड गर्दी उसळली. आधुनिक तंत्रज्ञान, आकर्षक डिझाईन आणि नवनवीन फीचर्स अनुभवण्यासाठी लोक अक्षरशः वेडे झालेले दिसले.

ग्राहकांनी सकाळी स्टोअर उघडण्यापूर्वीच रांग लावली होती. अनेकांनी तर रात्रीपासून स्टोअरबाहेर थांबून आपला क्रमांक टिकवून ठेवला. गर्दी एवढी वाढली की, काही ठिकाणी चाहत्यांमध्ये जागेवरून वाद निर्माण झाला आणि ढकलाढकली झाली. पोलिसांना तातडीने हस्तक्षेप करावा लागला.

नव्या iPhone 17 मध्ये दिलेले अत्याधुनिक कॅमेरा फीचर्स, अधिक वेगवान प्रोसेसर आणि आर्टिफिशियल इंटेलिजन्स आधारित फंक्शन्स ही प्रमुख आकर्षणे ठरत आहेत. विशेषतः तरुणाई आणि टेकप्रेमींमध्ये या फोनची प्रचंड क्रेझ पाहायला मिळत आहे.

ग्राहकांनी सांगितले की, “iPhone हा केवळ फोन नसून एक स्टेटस सिम्बॉल आहे. जगभरातील लाँचिंगसोबतच आम्हालादेखील हा फोन पहिल्यांदा हातात घ्यायचा आहे म्हणूनच आम्ही रांगेत उभे आहोत.”

या गोंधळामुळे वाहतुकीवरही काही काळ परिणाम झाला. स्थानिक प्रशासनाने सुरक्षा वाढवली असून, ॲपल स्टोअरमध्ये प्रवेशासाठी विशेष व्यवस्था करण्यात आली आहे.