अहिल्यानगर | माणुसकीचा एक हृदयद्रावक आणि धाडसपूर्ण किस्सा गंगापूर तालुक्यातील गुरुधानोरा शिवारात घडला आहे. एका गाईला वाचवण्यासाठी जीवाची पर्वा न करता पाण्यात उतरलेल्या २५ वर्षीय तरुणाने स्वतःचा जीव गमावला. ही दुर्दैवी घटना परिसरात हळहळ आणि दुःखाचा विषय ठरली आहे.
मिळालेल्या माहितीनुसार, गुरुधानोरा शिवारातील पाझर तलावावर गावातील एक गाय पाणी पित असताना अचानक तोल गेल्याने ती खोल पाण्यात पडली. गाईच्या पायात पायखुटी असल्याने तिला पोहता येत नव्हते आणि ती धडपडू लागली. हे दृश्य पाहून जवळच असलेला एक २५ वर्षीय तरुण क्षणाचाही विलंब न करता तिला वाचवण्यासाठी तलावात उतरला. मात्र त्यालाही पोहता येत नव्हते.
गाईला वाचवण्याच्या प्रयत्नात दोघांचाही तोल गेला आणि काही क्षणांतच ते दोघेही पाण्यात बुडाले. आजूबाजूच्या लोकांनी धाव घेऊन बचावकार्य सुरू केले, पण तोपर्यंत खूप उशीर झाला होता. गाईला तर वाचवण्यात यश आलं, मात्र तरुणाने मात्र स्वतःचा जीव गमावला.
या घटनेनंतर संपूर्ण गावात शोककळा पसरली आहे. ग्रामस्थ आणि स्थानिक प्रशासनाने घटनास्थळी धाव घेऊन मृतदेह बाहेर काढून शवविच्छेदनासाठी सरकारी रुग्णालयात पाठवला. या तरुणाने दाखवलेलं धाडस आणि माणुसकीचा आदर्श हे सर्वांना भावनिक करून गेलं आहे.
गावकऱ्यांच्या मते, हा तरुण नेहमी मदतीस तत्पर होता आणि गावातील सर्वांच्या दुःखात सहभागी होत असे. त्याचा असा अकाली मृत्यू झाल्याने गावावर दुःखाचा डोंगर कोसळला आहे.
