पंढरपूर (दि. ६ जुलै २०२५): संतांच्या भूमीत, भक्ती आणि सेवाभाव यांची सांगड घालणाऱ्या ‘निर्मल दिंडी’ या उपक्रमाचा समारोप समारंभ आज मुख्यमंत्री देवेंद्र फडणवीस यांच्या प्रमुख उपस्थितीत पंढरपूरमध्ये मोठ्या उत्साहात संपन्न झाला. ग्रामविकास व पंचायत राज विभागाच्या वतीने दरवर्षीप्रमाणे यंदाही या उपक्रमाद्वारे वारीतील स्वच्छता, शौचालयांची व्यवस्था आणि जनजागृती यांवर भर देण्यात आला.
या कार्यक्रमाला मंत्री ॲड. माणिकराव कोकाटे, मंत्री जयकुमार गोरे, मंत्री जयकुमार रावल, तसेच अनेक वरिष्ठ अधिकारी, सामाजिक कार्यकर्ते आणि हजारो वारकरी उपस्थित होते.
‘निर्मल दिंडी’चे मुख्य उद्दिष्ट:
वारी मार्गावर स्वच्छ भारत अभियानाचा प्रभावी अंमलबजावणी, डिजिटल प्रचार फलक, स्वच्छता कॅम्प, टँकरद्वारे पाणीपुरवठा व जैविक शौचालये यांची सुविधा, वारकऱ्यांना आरोग्य, स्वच्छता आणि कचरा व्यवस्थापन यांची माहिती देणारे जनजागृती रथ
मुख्यमंत्री देवेंद्र फडणवीस म्हणाले,
“वारी ही केवळ धार्मिक यात्रा नाही, ती संघटन, समर्पण आणि शिस्तीचा जागर आहे. या निमित्ताने स्वच्छतेचा संदेश देणारी ‘निर्मल दिंडी’ ही एक सामाजिक क्रांती आहे.”
त्यांनी पुढे नमूद केले की, महाराष्ट्रात संपूर्ण राज्यभर ग्रामस्वच्छतेचा वसा पंढरपूर वारीमधून अधिक बळकट होतोय, हे अत्यंत समाधानकारक आहे. या उपक्रमासाठी स्थानिक स्वराज्य संस्था, स्वयंसेवी संस्था आणि ग्रामस्थांचे योगदान अतुलनीय आहे.
‘निर्मल दिंडी २०२५’च्या यशस्वीतेसाठी:
३५०+ गावांमध्ये स्वच्छतेचे प्रशिक्षण
५००० स्वयंसेवकांनी वारी मार्गावर स्वच्छता राखली
५०० हून अधिक ठिकाणी बायो-टॉयलेट्स व हात धुण्याच्या सुविधा
दिंडीत सहभागी १० लाख वारकऱ्यांमध्ये स्वच्छतेविषयी प्रबोधन
