प्रत्येक जिल्ह्यात ‘सीट्रीपलआयटी’ केंद्रांची स्थापना करण्याचे उपमुख्यमंत्री अजित पवार यांचे निर्देश; युवकांना एआय, रोबोटिक्ससारख्या आधुनिक कौशल्यांचे प्रशिक्षण देण्यावर भर

मुंबई – राज्यातील तरुणांना रोजगारक्षम बनवण्यासाठी आणि आधुनिक तंत्रज्ञानाचे प्रशिक्षण देण्यासाठी, प्रत्येक जिल्ह्यात ‘सीट्रीपलआयटी’ (CIIIT – Centre for Invention, Innovation, Incubation and Training) केंद्र उभारण्याचे स्पष्ट निर्देश उपमुख्यमंत्री अजित पवार यांनी दिले. मंत्रालयातील उपमुख्यमंत्री कार्यालयात आयोजित आढावा बैठकीत हा निर्णय घेण्यात आला.

सध्या राज्यात १० केंद्रांना मंजुरी मिळाली असून उर्वरित २६ जिल्ह्यांमध्ये तातडीने ही केंद्रे स्थापन करण्यासाठी कार्यवाही करण्याचे आदेश देण्यात आले आहेत. यासाठी MIDC मार्फत आवश्यक जागा उपलब्ध करून देण्यात यावी आणि जिल्हा नियोजन समितीकडून १५% निधी देण्यात यावा, असे निर्देश पवार यांनी दिले.

युवकांसाठी तंत्रज्ञानाशी नाळ जुळवणारी संधी

या केंद्रांमधून दरवर्षी हजारो युवकांना AI (Artificial Intelligence), Automation, Robotics, Machine Learning यांसारख्या अत्याधुनिक तंत्रज्ञानाचे प्रशिक्षण दिले जाणार आहे. त्यामुळे राज्यातील युवकांचे कौशल्यवर्धन होणार असून त्यांना जागतिक स्तरावर नोकरीसाठी सज्ज करता येणार आहे.

उपमुख्यमंत्री अजित पवार म्हणाले, “राज्यातील तरुणांना जागतिक दर्जाचे प्रशिक्षण मिळावे, यासाठी कोणतीही तडजोड होणार नाही. प्रत्येक जिल्ह्यात कमीत कमी एक केंद्र आवश्यक आहे. हे केंद्र म्हणजे केवळ प्रशिक्षण केंद्र नाही, तर नवउद्योजकतेस चालना देणारे परिवर्तनाचे केंद्र असेल.”

 MIDC देणार जागा; शहराजवळची निवड आवश्यक

या प्रकल्पासाठी लागणारी जागा MIDC मार्फत उपलब्ध करून दिली जाणार असून ही जागा शहरांच्या जवळ असावी, जेणेकरून विद्यार्थ्यांना येण्या-जाण्यासाठी अडचण होणार नाही. खासदार सुनील तटकरे यांच्या मागणीवरून रायगड जिल्ह्यासाठी MIDC मार्फत निधी उपलब्ध करून देण्याचे आदेशही यावेळी देण्यात आले.

 उद्योगांसाठी प्रशिक्षित मनुष्यबळ

या उपक्रमांमुळे राज्यातील लघु, मध्यम आणि मोठ्या उद्योगांना अत्याधुनिक प्रशिक्षण घेतलेले मनुष्यबळ मिळणार असून नवउद्योजकतेलाही मोठा बूस्ट मिळेल. जिल्हा पातळीवर उद्योगस्नेही वातावरण निर्माण होईल आणि युवकांना स्वयंरोजगाराच्या संधी वाढतील.

 बैठकीस उपस्थित मान्यवर

या महत्त्वपूर्ण बैठकीला उद्योगमंत्री उदय सामंत, खासदार सुनील तटकरे, विविध विभागांचे अपर मुख्य सचिव, MIDC आणि कौशल्य विकास सोसायटीचे वरिष्ठ अधिकारी उपस्थित होते. सर्वांनी प्रकल्पाची अंमलबजावणी जलदगतीने करण्याच्या दृष्टीने आपली भूमिका स्पष्ट केली.

स्थळ: मंत्रालय, मुंबई
दिनांक: २४ जून २०२५
अध्यक्ष: उपमुख्यमंत्री अजित पवार