पुणे – यंदाच्या पावसाळ्यात दीर्घकाळ शांत राहिलेलं पुणे आता मुसळधार पावसाने अक्षरशः भिजून निघालं आहे. मंगळवार, १९ ऑगस्ट रोजी संध्याकाळी ५.३० वाजेपर्यंत शहरात ४१.४ मिमी पाऊस नोंदवला गेला, जो या हंगामातील दुसऱ्या क्रमांकाचा एकदिवसीय पावसाचा विक्रम ठरला आहे. यापूर्वी १३ जून रोजी ५५ मिमी पावसाची नोंद झाली होती.
ऑगस्ट महिन्याच्या पहिल्या पंधरवड्यात कमी पावसाने पुणेकरांना हैराण केलं होतं. मात्र, गेल्या दोन दिवसांपासून जोरदार पाऊस सुरू असून १८ ऑगस्टला २४ तासांत ३५ मिमी, तर १९ ऑगस्टला तब्बल ४१.४ मिमी पाऊस नोंदला गेला. या पावसामुळे ऑगस्ट महिन्याचा एकूण पावसाचा आकडा ८८ मिमीवर पोहोचला असून, सरासरी १४५.५ मिमी पावसाच्या तुलनेत अजून कमी आहे.
लोहगाव केंद्रावर ४४.८ मिमी, पाषाणवर २३.३ मिमी, तर चिंचवडमध्ये ४१.५ मिमी पावसाची नोंद झाली. घाटमाथ्यावर मात्र पावसाने विक्रमी हजेरी लावली आहे. मुळशीतील ताम्हिणी केंद्रावर तब्बल ३२० मिमी, मावळातील दवडी येथे २२५ मिमी, तर लोणावळा येथे १४५ मिमी पावसाची नोंद झाली.
या मुसळधार पावसामुळे पुणे जिल्ह्यातील धरणांचा जलसाठा झपाट्याने वाढला. खडकवासला धरणाचा साठा १८ ऑगस्ट रोजी ५३.१२% होता; तो केवळ २४ तासांत ८६.९९% झाला. त्यामुळे मंगळवारी १९ ऑगस्ट रोजी संध्याकाळी धरणातून मोठ्या प्रमाणात विसर्ग सुरू करण्यात आला.
खडकवासला धरणाचा विसर्ग १,६०० क्युसेकवरून वाढवून थेट ३५,३१० क्युसेक करण्यात आला.
पानशेत धरणातून १२,३०८ क्युसेक, तर वरसगाव धरणातून १२,४१६ क्युसेक पाणी सोडण्यात आले.
एकत्रितपणे मुठा नदीपात्रात प्रचंड प्रमाणात पाणी सोडल्याने खालच्या भागात राहणाऱ्या नागरिकांना पूरस्थितीचा इशारा देण्यात आला आहे.
प्रशासनाने नदीकाठच्या भागातील नागरिकांना सतर्क राहण्याचे, अनावश्यक बाहेर न पडण्याचे आणि आवश्यक असल्यास सुरक्षित स्थळी स्थलांतर करण्याचे आवाहन केले आहे. बचाव पथके सतत सज्ज ठेवण्यात आली असून, पावसाचा जोर सुरू राहिल्यास विसर्ग आणखी वाढण्याची शक्यता वर्तवली जात आहे.
