पत्नीच्या हत्येनंतर १८ वर्षे ओळख बदलून फरार; लोणावळा ग्रामीण पोलिसांनी परभणीतून आरोपीच्या मुसक्या आवळल्या!
दारूसाठी पैसे न दिल्याच्या रागातून पत्नीच्या अंगावर रॉकेल ओतून पेटविल्याचा आरोप; १८ वर्षांपासून पोलिसांना गुंगारा देणारा आरोपी अखेर जेरबंद; गोपनीय माहिती आणि तांत्रिक विश्लेषणाच्या आधारे लोणावळा ग्रामीण पोलिसांची धडाकेबाज कारवाई
लोणावळा (पुणे) : दारू पिण्यासाठी पैसे देण्यास नकार दिल्याच्या रागातून पत्नीच्या अंगावर रॉकेल ओतून तिला पेटवून देत तिची निर्घृण हत्या केल्याच्या प्रकरणात तब्बल १८ वर्षांपासून फरार असलेल्या आरोपीला लोणावळा ग्रामीण पोलिसांनी अखेर बेड्या ठोकल्या आहेत. स्वतःचे नाव, पत्ता आणि ओळख बदलून पोलिसांना गुंगारा देणाऱ्या आरोपीचा परभणी जिल्ह्यात शोध घेऊन त्याला शिताफीने ताब्यात घेण्यात आले. लिंबाजी नामदेव सोगेवाड (वय ५८ वर्षे, मूळ रा. महातपूर, ता. गंगाखेड, जि. परभणी) असे अटक करण्यात आलेल्या आरोपीचे नाव आहे. गोपनीय माहिती, तांत्रिक विश्लेषण आणि नियोजनबद्ध तपासाच्या जोरावर लोणावळा ग्रामीण पोलिसांनी ही कारवाई यशस्वी केली.
मिळालेल्या माहितीनुसार, ही धक्कादायक घटना १ मार्च २००८ रोजी रात्री सुमारे ८.३० वाजण्याच्या सुमारास पुणे जिल्ह्यातील मावळ तालुक्यातील कुसगाववाडी येथे घडली होती. त्यावेळी आरोपी लिंबाजी सोगेवाड हा दारूच्या नशेत घरी आला होता. त्याने पत्नी लता लिंबाजी सोगेवाड (वय २५ वर्षे) यांच्याकडे दारू पिण्यासाठी पैशांची मागणी केली. मात्र, पत्नीने पैसे देण्यास नकार दिल्यामुळे आरोपी संतापला. त्यानंतर त्याने घरातील स्वयंपाकघरात ठेवलेली रॉकेलची कॅन आणून पत्नीच्या अंगावर रॉकेल ओतले आणि काडीपेटीतील काडी पेटवून तिला आग लावल्याचे पोलीस प्रसिद्धीपत्रकात नमूद करण्यात आले आहे. या घटनेत लता सोगेवाड यांचा मृत्यू झाला.
या गंभीर घटनेनंतर आरोपी लिंबाजी सोगेवाड हा घटनास्थळावरून पसार झाला होता. पत्नीच्या हत्येच्या प्रकरणात पोलिसांकडून शोध सुरू असतानाही तो हाती लागत नव्हता. तब्बल १८ वर्षे आरोपीने पोलिसांना गुंगारा दिला. अटक टाळण्यासाठी त्याने स्वतःचे नाव, पत्ता आणि ओळख बदलून परभणी जिल्ह्यात वास्तव्य केल्याची माहिती पोलीस तपासात समोर आली. त्यामुळे त्याचा माग काढणे पोलिसांसमोर मोठे आव्हान ठरले होते.
दरम्यान, पुणे ग्रामीण पोलीस दलाकडून फरार आरोपींचा शोध घेण्यासाठी विशेष मोहीम हाती घेण्यात आली होती. या मोहिमेअंतर्गत अनेक वर्षांपासून फरार असलेल्या आरोपींचा शोध घेऊन त्यांच्यावर कायदेशीर कारवाई करण्याचे आदेश देण्यात आले होते. त्यानुसार लोणावळा ग्रामीण पोलीस स्टेशनचे परिविक्षाधीन पोलीस उपअधीक्षक तथा प्रभारी अधिकारी भूषण माने आणि महिला सहायक पोलीस निरीक्षक विजया म्हेत्रे यांच्या मार्गदर्शनाखाली विशेष तपास पथक तयार करण्यात आले.
या पथकातील पोलीस नाईक नाथा केकाण यांना फरार आरोपी लिंबाजी सोगेवाड याच्याबाबत महत्त्वाची गोपनीय माहिती मिळाली. आरोपी हा परभणी जिल्ह्यात स्वतःची ओळख बदलून राहत असल्याचे समोर आले. मिळालेल्या माहितीची खातरजमा करून पोलिसांनी आरोपीचा ठावठिकाणा शोधण्यास सुरुवात केली. तांत्रिक विश्लेषण आणि गोपनीय माहितीच्या आधारे आरोपी परभणी जिल्ह्यातील गंगाखेड तालुक्यातील महातपूर गावात असल्याचे निष्पन्न झाले.
त्यानंतर वरिष्ठ पोलीस अधिकाऱ्यांच्या सूचनेनुसार लोणावळा ग्रामीण पोलीस स्टेशनच्या तपास पथकाने परभणी जिल्ह्यात धाव घेतली. महातपूर गावात आरोपीचा शोध घेण्यासाठी नियोजनबद्ध पद्धतीने कारवाई करण्यात आली. स्थानिक पातळीवरील माहिती आणि तांत्रिक तपासाच्या मदतीने आरोपीचा ठावठिकाणा निश्चित करण्यात आला. त्यानंतर पोलिसांनी महातपूर येथे धाड टाकून लिंबाजी सोगेवाड याला शिताफीने ताब्यात घेतले. अशाप्रकारे तब्बल १८ वर्षांपासून फरार असलेला आरोपी अखेर पोलिसांच्या जाळ्यात अडकला.
विशेष म्हणजे, या कारवाईसाठी लोणावळा ग्रामीण पोलिसांनी परभणी जिल्ह्यातील सोनपेठ पोलीस स्टेशनची मदत घेतली. तसेच महातपूर येथील पोलीस पाटील विजय चाफळे यांनीही आरोपीचा शोध घेण्यासाठी पोलिसांना सहकार्य केले. स्थानिक पोलिसांच्या समन्वयामुळे आणि लोणावळा ग्रामीण पोलिसांच्या तपासामुळे अनेक वर्षांपासून प्रलंबित असलेल्या हत्या प्रकरणातील फरार आरोपीला पकडण्यात यश आले.
ही उल्लेखनीय कारवाई पुणे ग्रामीणचे पोलीस अधीक्षक संदीप सिंह गिल, अपर पोलीस अधीक्षक शुभम कुमार, लोणावळा विभागाचे उपविभागीय पोलीस अधिकारी गजानन टोम्पे यांच्या मार्गदर्शनाखाली करण्यात आली. तसेच लोणावळा ग्रामीण पोलीस स्टेशनचे प्रभारी अधिकारी तथा परिविक्षाधीन पोलीस उपअधीक्षक भूषण माने आणि सहायक पोलीस निरीक्षक विजया म्हेत्रे यांनी तपास पथकाला आवश्यक मार्गदर्शन केले.
या कारवाईत पोलीस उपनिरीक्षक सागर अरगडे, पोलीस उपनिरीक्षक नाथा केकाण, पोलीस हवालदार जय पवार, पोलीस हवालदार ईश्वर काळे, पोलीस हवालदार केतन तळपे, पोलीस शिपाई गोकुळ खेडकर, पोलीस शिपाई अमोल गवारी आणि पोलीस शिपाई क्रमांक १६८८ शेख यांनी सहभाग घेतला. तसेच सोनपेठ पोलीस स्टेशन, जिल्हा परभणी आणि महातपूरचे पोलीस पाटील विजय चाफळे यांचेही या कारवाईत महत्त्वपूर्ण सहकार्य लाभले.
पत्नीच्या हत्येनंतर तब्बल १८ वर्षे फरार राहून स्वतःची ओळख बदलणाऱ्या आरोपीला अटक करण्यात लोणावळा ग्रामीण पोलिसांना यश आल्याने जुन्या गंभीर गुन्ह्यांच्या तपासाला पुन्हा गती मिळण्याची अपेक्षा व्यक्त होत आहे. या कारवाईतून कितीही वर्षे लोटली तरी गंभीर गुन्ह्यातील फरार आरोपींचा शोध घेण्यासाठी पोलीस यंत्रणा प्रयत्नशील असल्याचे दिसून आले आहे.
दरम्यान, आरोपी लिंबाजी सोगेवाड याला ताब्यात घेतल्यानंतर या हत्या प्रकरणाच्या अनुषंगाने पुढील कायदेशीर प्रक्रिया सुरू असून, या प्रकरणाचा पुढील तपास पोलीस उपनिरीक्षक नाथा केकाण करीत आहेत.
