पिंपरी-चिंचवडमध्ये भयानक घटना ३ वर्षाच्या चिमुरड्यावर अत्याचार करून खून.
पिंपरी-चिंचवड: २ मे २०२६ भोर तालुक्यातील अत्याचाराची घटना ताजी असतानाच चाकणच्या (Chakan) म्हाळुंगे दक्षिण पोलीस ठाण्याच्या हद्दीतील अत्यंत धक्कादायक आणि संतापजनक घटना घडली आहे. एका निष्पाप ३ वर्षांच्या चिमुरड्यावर अत्याचार करून त्याची निर्घृण हत्या झाल्यामुळे संपूर्ण समाज हादरला आहे.
घटनेचा सविस्तर आढावा: पिंपरी-चिंचवड पोलीस आयुक्तालयांतर्गत येणाऱ्या महाळुंगे दक्षिण पोलीस स्टेशनच्या हद्दीत, खालुंब्रे गावात ही अमानुष घटना घडली. मृत मुलगा हा मूळचा मध्य प्रदेशचा असून त्याचे कुटुंब येथे भाड्याने राहत होते. काल संध्याकाळी तो घरासमोर खेळत असताना अचानक बेपत्ता झाला.
नंतर समोर आलेल्या माहितीनुसार, आरोपीने त्या चिमुरड्याचे अपहरण करून त्याला एका निर्जन ठिकाणी नेले. तिथे त्याच्यावर लैंगिक अत्याचार करून त्याची गळा चिरून हत्या करण्यात आली. या क्रूर कृत्यामुळे परिसरात भीती आणि संतापाचे वातावरण निर्माण झाले आहे.
पोलिसांची कारवाई : घटनेचे गांभीर्य लक्षात घेऊन महाळुंगे दक्षिण पोलिसांनी तात्काळ तपास सुरू केला. तांत्रिक विश्लेषण (CCTV, लोकेशन ट्रॅकिंग) आणि गुप्त माहितीच्या आधारे आरोपीचा माग काढण्यात आला. आरोपी हा मूळचा बिहारचा असून गुन्ह्यानंतर राज्याबाहेर पळून जाण्याच्या तयारीत होता.
मात्र, पोलिसांनी अत्यंत शिताफीने कारवाई करत त्याला पुणे रेल्वे स्थानक परिसरातून अटक केली. आरोपी अल्पवयीन असल्याची माहिती समोर आली आहे.
परिसरातील प्रतिक्रिया : या घटनेनंतर खालुंब्रे परिसरात संतापाची लाट उसळली असून नागरिकांमध्ये भीतीचे वातावरण आहे. तसेच, संपूर्ण परिसरात शोककळा पसरली आहे.
महाळुंगे दक्षिण पोलीस या प्रकरणाचा सखोल तपास करत असून, आरोपीवर कठोर कारवाई करण्याची मागणी नागरिकांकडून होत आहे
