पिंपरी-चिंचवडमध्ये आई-मुलाच्या मृत्यूने खळबळ;१८ व्या मजल्यावरून आईची मुलासह उडी,आठ पानी चिठ्ठीमुळे तपासाला नवे वळण.
डांगे चौकातील सिग्नेचर पार्कमधील घटना; दीर्घकालीन आजार आणि कौटुंबिक भविष्याबाबतच्या चिंतांचा चिठ्ठीत उल्लेख असल्याची प्राथमिक माहिती
**पिंपरी-चिंचवड, दि. १ नोव्हेंबर :** डांगे चौक परिसरातील सिग्नेचर पार्क सोसायटीमध्ये घडलेल्या आई आणि सहा वर्षांच्या मुलाच्या मृत्यूच्या घटनेने संपूर्ण पिंपरी-चिंचवड शहर हादरले आहे. ३० ऑक्टोबर रोजी सायंकाळी ही घटना घडली. एकता मनोज भांगड (वय ३३) आणि त्यांचा मुलगा माधव अशी मृतांची नावे आहेत. या घटनेनंतर पोलिसांना महिलेने लिहिलेली सात ते आठ पानी चिठ्ठी मिळाल्याने तपासाला महत्त्वाचे वळण मिळाले आहे.
एकता या पती आणि मुलासह सोसायटीच्या सातव्या मजल्यावर राहत होत्या. शुक्रवारी सकाळी पती कामावर गेल्यानंतर त्या मुलासह घरी होत्या. सायंकाळी साडेसहाच्या सुमारास सोसायटी परिसरात घडलेल्या घटनेची माहिती मिळताच रहिवाशांनी घटनास्थळी धाव घेतली. त्यानंतर वाकड पोलिसांना पाचारण करण्यात आले. पोलिसांनी घटनास्थळाचा पंचनामा करून पुढील कार्यवाही केली.
तपासादरम्यान सोसायटीतील सीसीटीव्ही फुटेज पोलिसांनी तपासले. त्यामध्ये एकता या मुलाला घेऊन लिफ्टने १८ व्या मजल्यावर जाताना दिसल्याची माहिती समोर आली आहे. घटनास्थळी दोघांची पादत्राणेही आढळल्याचे सांगण्यात येत आहे.
दरम्यान, घरातून मिळालेल्या आठ पानी चिठ्ठीत एकता यांनी आपल्या आरोग्यविषयक समस्यांचा आणि भविष्यातील कौटुंबिक परिस्थितीचा उल्लेख केल्याची प्राथमिक माहिती आहे. त्या अनेक वर्षांपासून पाठीच्या मणक्याच्या आजाराने त्रस्त होत्या. विविध रुग्णालयांमध्ये उपचार घेतल्याचाही उल्लेख चिठ्ठीत असल्याचे वृत्त आहे. आपल्या पश्चात पतीने नव्याने आयुष्य सुरू करावे, तसेच मुलाच्या भवितव्याबाबत त्यांनी चिंता व्यक्त केल्याचे समजते.
मात्र, चिठ्ठीतील मजकूर, त्यामागील नेमकी पार्श्वभूमी आणि घटनेची कारणे याबाबत पोलिसांकडून पडताळणी सुरू आहे. वाकड पोलिसांकडून सीसीटीव्ही फुटेज, घटनास्थळावरील पुरावे आणि इतर संबंधित बाबींच्या आधारे पुढील तपास केला जात आहे.
