उदयपूर | दक्षिणात्य चित्रपटसृष्टीतील लोकप्रिय जोडी Rashmika Mandanna आणि Vijay Deverakonda यांच्या विवाहसोहळ्याची धूम सध्या राजस्थानातील Udaipur येथे पाहायला मिळत आहे. चाहत्यांनी प्रेमाने ‘VIROSH’ असे नाव दिलेल्या या जोडीच्या प्री-वेडिंग सेलिब्रेशनला सुरुवात झाली असून, सोशल मीडियावर या सोहळ्याची जोरदार चर्चा रंगली आहे.
कुटुंबीय आणि जवळच्या मित्रमंडळींसह हे दोघे ‘डेस्टिनेशन वेडिंग’साठी उदयपूरमध्ये दाखल झाले आहेत. तलावांच्या नगरीत पूलसाईड पार्टी, संगीत आणि खास जपानी डिनर अशा ‘इंटिमेट’ कार्यक्रमांची रंगत पाहायला मिळत आहे. समोर आलेल्या छायाचित्रांमधून या शाही सोहळ्याची झलक चाहत्यांना पाहायला मिळत आहे.
या विवाहासाठी खास गेस्ट लिस्ट तयार करण्यात आल्याची माहिती समोर आली आहे. रश्मिकाच्या आगामी चित्रपट The Girlfriend चे दिग्दर्शक Rahul Ravindran तसेच अभिनेत्री Ashika Ranganath हे सोहळ्यासाठी उदयपूरमध्ये पोहोचले आहेत.
विजयसह Pelli Choopulu मध्ये काम केलेले दिग्दर्शक Tharun Bhascker आणि अभिनेत्री Eesha Rebba हेही सुरुवातीच्या पाहुण्यांमध्ये सहभागी झाले. याशिवाय कपलची जवळची मैत्रीण आणि स्टायलिस्ट Shravya Varma हिलाही वेडिंग व्हेन्यूवर पाहण्यात आले.
गॉसिप वर्तुळात अशीही चर्चा आहे की दिग्दर्शक Sandeep Reddy Vanga, अभिनेता Allu Arjun, Salman Khan, Karan Johar, Vicky Kaushal, Kriti Sanon आणि Ranbir Kapoor यांसारखे बॉलिवूडमधील मोठे सेलिब्रिटीही या शाही विवाहसोहळ्याला उपस्थित राहू शकतात.
या सोहळ्यामुळे दक्षिण आणि हिंदी चित्रपटसृष्टीतील अनेक मान्यवर एकाच छताखाली येणार असल्याने हा विवाह सोहळा वर्षातील सर्वात चर्चित कार्यक्रम ठरण्याची शक्यता आहे. चाहत्यांमध्ये या शाही लग्नाच्या अधिकृत छायाचित्रे आणि व्हिडिओंची उत्सुकता शिगेला पोहोचली आहे.
