मुंबई महानगरपालिका निवडणुकीच्या पार्श्वभूमीवर मुख्यमंत्री देवेंद्र फडणवीस यांनी मराठी अस्मितेबाबत ठाम भूमिका मांडत मोठं विधान केलं आहे. “बीएमसीचं नेतृत्व मराठी माणसाच्याच हातात राहणार,” असा स्पष्ट संदेश देत त्यांनी जनता आणि विरोधक दोघांनाही इशारा दिला. मराठी समाजाच्या अस्तित्वावर संकट असल्याचा दावा करणाऱ्या राजकीय पक्षांवर त्यांनी थेट निशाणा साधला.
मुख्यमंत्री फडणवीस म्हणाले की, “मराठी समाज धोक्यात नाही, तर काही राजकीय शक्तींचं अस्तित्व धोक्यात आलं आहे. मराठी माणसाची ताकद आणि ओळख कोणीही पुसून टाकू शकत नाही.” बीएमसी निवडणुकीपूर्वी मराठी भाषा, ओळख आणि संस्कृती यावरून सुरू असलेल्या राजकारणावरही त्यांनी आपली भूमिका स्पष्ट केली.
भाषावादाच्या मुद्द्यावर बोलताना मुख्यमंत्री म्हणाले, “शाळांमध्ये हिंदी आणि इंग्रजी शिकवण्याचा निर्णय हा उद्धव ठाकरे यांच्या सरकारच्या काळातच मान्य झाला होता. आमच्या सरकारने केवळ या निर्णयाचा सखोल अभ्यास करण्यासाठी समिती स्थापन केली आहे.” यावरून गैरसमज पसरवून जनतेची दिशाभूल केली जात असल्याचा आरोपही त्यांनी केला.
फडणवीस यांच्या या वक्तव्यामुळे बीएमसी निवडणूक अधिकच रंगतदार होण्याची चिन्हे आहेत. मराठी अस्मिता, विकास आणि नेतृत्व या मुद्द्यांवर येणारी निवडणूक केवळ सत्तेची नाही, तर मुंबईच्या भवितव्याची लढाई ठरणार असल्याचं राजकीय वर्तुळात बोललं जात आहे.
