महाराष्ट्रात शेतकऱ्यांचा संताप पुन्हा एकदा उफाळून आला आहे. शेतमालाला हमीभाव, कर्जमाफी आणि पिकविमा यांसारख्या अनेक प्रलंबित मागण्यांसाठी राज्यभरातील शेतकरी रस्त्यावर उतरले आहेत. नागपूर सीमेवर पोहोचलेल्या आंदोलनकर्त्यांना पोलिसांनी थांबवले असून, परिस्थिती नियंत्रणात ठेवण्यासाठी मोठा पोलिस बंदोबस्त तैनात करण्यात आला आहे.
दरम्यान, शेतकरी संघटनांनी मुख्यमंत्र्यांकडे थेट चर्चा घेण्याची मागणी केली असून, सरकारने त्वरित निर्णय घ्यावा अन्यथा आंदोलन अधिक तीव्र करण्याचा इशारा दिला आहे. नागपूरमध्ये मुख्यमंत्री निवासस्थानाभोवती सुरक्षा वाढवण्यात आली असून, विशेष पोलीस पथक तैनात करण्यात आले आहे.
राज्यभरातील अनेक ठिकाणी शेतकऱ्यांनी निदर्शने सुरू केली असून, रस्ते रोको आणि मोर्चांच्या माध्यमातून आपल्या मागण्यांकडे सरकारचे लक्ष वेधण्याचा प्रयत्न सुरू आहे. यामुळे वाहतुकीवरही परिणाम झाला आहे.
राज्य सरकारने शेतकऱ्यांच्या मागण्यांवर सकारात्मक भूमिका घेतल्याचे सांगितले असले तरी, शेतकरी संघटनांचा विश्वास बसत नाहीये. येत्या काही दिवसांत या आंदोलनाचा स्वरूप आणखी तीव्र होण्याची शक्यता आहे.
