चिंचवड : चिंचवड येथील नॉव्हेल इंटरनॅशनल विद्यालयात ७९ वा स्वातंत्र्य दिन उत्साह, शिस्त आणि राष्ट्रभक्तीच्या रंगांनी उजळून निघाला. या कार्यक्रमात इतिहास, संस्कृती आणि शिक्षणाचा सुंदर संगम साधण्यात आला. विद्यालयाने सादर केलेल्या विविध उपक्रमांनी उपस्थितांना अभिमान, प्रेरणा आणि राष्ट्रप्रेमाने भारावून टाकले.
कार्यक्रमाची सुरुवात ध्वजारोहण सोहळ्याने झाली. राष्ट्रध्वजाला मानवंदना देताना विद्यार्थ्यांच्या चेहऱ्यावर उमटलेली देशभक्तीची झळाळी पाहून संपूर्ण परिसर भारावून गेला. त्यानंतर विद्यार्थ्यांनी सादर केलेल्या देशभक्तिगीते, नाटिका आणि नृत्यांनी वातावरणात देशप्रेमाचे सूर गुंजवले.
या सोहळ्याला नॉव्हेल संस्थेचे संस्थापक अध्यक्ष व आमदार मा. श्री. अमित गोरखे, संचालक श्री. विलास जेऊरकर, विद्यालय व्यवस्थापक डॉ. प्रिया गोरखे, तांत्रिक विभाग प्रमुख श्री. समीर जेऊरकर आणि मुख्याध्यापिका सौ. मृदुला गायकवाड यांची प्रमुख उपस्थिती लाभली. त्यांच्या उपस्थितीने कार्यक्रमाला एक वेगळेच महत्त्व प्राप्त झाले.
विशेष आकर्षण ठरले ते शाळेचे दोन माजी विद्यार्थी – अरबाज कलावंत आणि वैभव चव्हाण – यांची उपस्थिती. त्यांनी शिक्षणाच्या जोरावर गाठलेली शिखरे विद्यार्थ्यांसाठी प्रेरणादायी ठरली. त्यांच्या उपस्थितीने “शिक्षण हेच सर्वात मोठं शस्त्र” हा संदेश विद्यार्थ्यांपर्यंत पोहोचला.
आमदार अमित गोरखे यांनी विद्यार्थ्यांना उद्देशून केलेल्या भाषणात स्वातंत्र्य दिनाचे महत्त्व अधोरेखित करत, सामाजिक जबाबदारी आणि देशासाठी योगदान देण्याची नवी पिढीकडून अपेक्षा व्यक्त केली. त्याचबरोबर स्टुडंट कौन्सिल सदस्यांची औपचारिक निवडही याच मंचावर जाहीर करण्यात आली, ज्यामुळे विद्यार्थ्यांमध्ये नेतृत्वगुणांचा विकास होईल.
कार्यक्रमात पोलीस निरीक्षक श्री. संतोष कसबे यांनी ‘अमली पदार्थांपासून मुक्त समाज’ या विषयावर मार्गदर्शन केले. त्यांच्या भाषणाने विद्यार्थ्यांमध्ये सामाजिक भान, जबाबदारी आणि दृढ निश्चय निर्माण झाला.
या प्रेरणादायी सोहळ्याला पालक, नागरिक आणि विद्यार्थ्यांची मोठ्या संख्येने उपस्थिती लाभली. नॉव्हेल इंटरनॅशनल विद्यालयाचा हा उपक्रम केवळ शालेय कार्यक्रम ठरला नाही, तर राष्ट्रप्रेम, सामाजिक जाणीव आणि एकतेचा दीप उजळवणारा प्रेरणादायी अनुभव ठरला. “राष्ट्रप्रेमाचा उत्सव! चिंचवडमधील नॉव्हेल इंटरनॅशनल विद्यालयात स्वातंत्र्य दिन सोहळा उत्साहात”
