इंदूर (मध्य प्रदेश) शहरातील भागीरथपुरा परिसरात दूषित पिण्याच्या पाण्यामुळे उलटी-जुलाबाची गंभीर साथ पसरली असून, संपूर्ण परिसरात महामारीसदृश परिस्थिती निर्माण झाली आहे. अत्यंत कमी कालावधीत एका मर्यादित भागात इतक्या मोठ्या संख्येने नागरिक आजारी पडण्याची ही राज्यातील पहिलीच घटना मानली जात आहे.
आतापर्यंत ३२०० पेक्षा अधिक रुग्णांची नोंद झाली असून, त्यामध्ये लहान मुले, वृद्ध, महिला आणि गर्भवती महिलांचा मोठ्या प्रमाणात समावेश आहे. अनेक कुटुंबांतील सर्वच सदस्य आजारी पडल्याने संपूर्ण वस्तीवर आरोग्यसंकट कोसळले आहे. अनेक रुग्णांना तीव्र निर्जलीकरणाचा त्रास होत असल्याने त्यांना तातडीने रुग्णालयात दाखल करावे लागत आहे.
परिस्थितीची गंभीरता लक्षात घेता राज्य सरकारने राष्ट्रीय स्तरावरील आरोग्य संस्था आणि तज्ज्ञ पथकांना इंदूरमध्ये पाचारण केले आहे. दूषित पाण्याचा स्रोत, पाणीपुरवठा लाईनमधील गळती, सांडपाणी मिसळण्याची शक्यता यांचा सखोल तपास सुरू आहे. पाण्याचे नमुने प्रयोगशाळेत पाठवण्यात आले असून अहवालांची प्रतीक्षा आहे.
दरम्यान, प्रशासनाने भागीरथपुरा परिसरातील पाणीपुरवठा तात्पुरता बंद केला असून, टँकरद्वारे शुद्ध पिण्याचे पाणी पुरवले जात आहे. नागरिकांना उकळलेले पाणीच पिण्याचे, बाहेरील खाद्यपदार्थ टाळण्याचे आणि लक्षणे दिसताच त्वरित उपचार घेण्याचे आवाहन करण्यात आले आहे.
आरोग्य विभागाकडून घराघरांत जाऊन सर्वेक्षण, औषधवाटप आणि जनजागृती केली जात आहे. अतिरिक्त खाटांची व्यवस्था, डॉक्टर-नर्सेसची संख्या वाढवणे आणि आपत्कालीन नियंत्रण कक्ष सुरू करण्यात आला आहे. नागरिकांमध्ये भीतीचे वातावरण असले तरी प्रशासन परिस्थिती नियंत्रणात आणण्यासाठी युद्धपातळीवर प्रयत्न करत असल्याचे स्पष्ट केले आहे.
