पिंपरी:आजच्या डिजिटल युगात आयटी क्षेत्र झपाट्याने बदलत असून, कृत्रिम बुद्धिमत्ता (AI), चॅटबॉट्स आणि चॅट जीपीटी सारख्या तंत्रज्ञानाने आपल्या जीवनाचा अविभाज्य भाग घेतला आहे. तीन-चार वर्षांत तंत्रज्ञानाच्या स्वरूपात क्रांतिकारी बदल होत असल्याने विद्यार्थ्यांनी स्वतःची कौशल्ये अद्ययावत ठेवणे गरजेचे आहे. “स्वयं शिक्षणावर भर द्या, कौशल्ये आत्मसात करा आणि भविष्यातील आव्हानांना समर्थपणे सामोरे जा,” असे मार्गदर्शन सोगिती कॅपजेमिनीच्या वरिष्ठ संचालक कांचन भोंडे यांनी केले.
दीक्षारंभ समारंभात विद्यार्थ्यांना प्रेरणा
पिंपरी चिंचवड एज्युकेशन ट्रस्ट (पीसीईटी) संचालित पिंपरी चिंचवड विद्यापीठ, साते मावळ येथे २०२५-२६ या नवीन शैक्षणिक वर्षात प्रवेश घेतलेल्या विद्यार्थी व त्यांच्या पालकांसाठी सोमवारी (२५ ऑगस्ट) ‘दीक्षारंभ’ समारंभाचे आयोजन करण्यात आले होते.
या वेळी पीसीईटीचे अध्यक्ष ज्ञानेश्वर लांडगे, विश्वस्त व विद्यापीठाचे कुलपती हर्षवर्धन पाटील, उद्योजक नरेंद्र लांडगे, धनंजय काळभोर, प्रभारी कुलगुरू डॉ. गोविंद कुलकर्णी, प्र-कुलगुरू डॉ. सुदीप थेपडे, विभाग प्रमुख डॉ. रामदास बिरादार, अभियांत्रिकी विभाग अधिष्ठाता डॉ. विजय पाटील आदी मान्यवर उपस्थित होते.
स्वयंप्रेरणेतून शिक्षणाचे महत्त्व
कांचन भोंडे यांनी विद्यार्थ्यांना उद्देशून सांगितले की, “ज्ञानाच्या कक्षा रुंदावण्यासाठी स्वयं प्रेरणेने अभ्यास करणे आवश्यक आहे. शिक्षक मार्गदर्शक असतात, पण शिकण्याची खरी जबाबदारी विद्यार्थ्यांची असते. बदलत्या तंत्रज्ञानाला जुळवून घेतलं, तरच भविष्यात यश नक्की आहे.”
विद्यापीठाची प्रगती आणि पालकांची भूमिका
हर्षवर्धन पाटील म्हणाले, “पीसीईटी शैक्षणिक संस्था मागील ३०-३५ वर्षांपासून विद्यार्थ्यांचे उज्ज्वल भविष्य घडवत आहेत. काटेकोर शिस्त, उत्कृष्ट प्राध्यापकवर्ग आणि दर्जेदार शिक्षणामुळे या संस्थेला आंतरराष्ट्रीय दर्जा मिळाला आहे. अभ्यासासोबत मानसिक आणि शारीरिक तंदुरुस्ती आवश्यक असून, विद्यापीठात कार्यरत क्रीडा विभागाचा विद्यार्थीांनी लाभ घ्यावा.”
त्यांनी पालकांनाही संदेश दिला की, “पाळ्याच्या प्रगतीसाठी नियमित प्राध्यापकांशी संवाद साधावा. मुलांच्या शैक्षणिक प्रवासात पालकांचा सहभाग अत्यंत महत्त्वाचा आहे.”
गुणवंतांचा गौरव
दीक्षारंभ सोहळ्यात प्रथम वर्ष अभियांत्रिकीतील विशेष प्राविण्य मिळवलेल्या विद्यार्थ्यांचा मान्यवरांच्या हस्ते सन्मान करण्यात आला. पार्थ पेटकर, दिव्यांश गांगुर्डे, रिद्धीमा सिन्हा, स्वराली संते, हर्षदा गोंथे, मानव जोशी, काशवी श्रीवास्तव, वैष्णवी खंडेलवाल या विद्यार्थ्यांना विशेष पुरस्काराने गौरविण्यात आले.
कार्यक्रमाची वैशिष्ट्ये
समारंभात विविध विद्या शाखांचे अधिष्ठाता, प्राध्यापक, विद्यार्थी व पालक मोठ्या संख्येने उपस्थित होते. कार्यक्रमाचे सूत्रसंचालन शितल विसपूते यांनी केले, तर आभारप्रदर्शन रितू दुधमल यांनी मानले. या भव्य समारंभाचे आयोजन पीसीईटी अध्यक्ष ज्ञानेश्वर लांडगे, उपाध्यक्षा पद्माताई भोसले, सचिव विठ्ठल काळभोर, खजिनदार शांताराम गराडे, कुलपती हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई यांच्या मार्गदर्शनाखाली करण्यात आले होते.
“आयटी अभियांत्रिकीचा झपाट्याने विकास – विद्यार्थ्यांनी आत्मसात करावी कौशल्ये : पिंपरी चिंचवड विद्यापीठातील ‘दीक्षारंभ’ सोहळ्यात कांचन भोंडे यांचे मार्गदर्शन”
