मुंबई – आकाशवाणी आमदार निवासातील कॅन्टीनमध्ये घडलेला मारहाणीचा प्रकार आता गंभीर वळणावर गेला आहे. कॅन्टीन कर्मचाऱ्याला मारहाण केल्याप्रकरणी आमदार संजय गायकवाड यांच्यावर अखेर अदखलपात्र गुन्हा दाखल करण्यात आला आहे. मुख्यमंत्री देवेंद्र फडणवीस यांनी या प्रकरणाची गंभीर दखल घेत, “तक्रारीची वाट न बघता चौकशी करा आणि कारवाई करा” असा स्पष्ट आदेश पोलिसांना दिला होता.
काय आहे संपूर्ण प्रकरण?
दि. ९ जुलै २०२५ रोजी, आमदार निवासातील कॅन्टीनमध्ये आमदार संजय गायकवाड आणि कर्मचाऱ्यांमध्ये वाद निर्माण झाला. या वादात गायकवाड यांनी कर्मचाऱ्याला शिवीगाळ करत सौम्य मारहाण केल्याचा आरोप आहे. त्यानंतर घटनेचा व्हिडिओ आणि माहिती प्रसारमाध्यमांद्वारे समोर आली.
गायकवाडांचा दावा: “हो, मारलं पण सौम्य होतं!”
माध्यमांशी बोलताना गायकवाड यांनी मारहाणीचे समर्थन करत स्पष्टपणे सांगितले की, “होय, मी कर्मचाऱ्याला सौम्य प्रकारे मारले. त्यात काही गैर नाही. माझा हेतू फक्त शिस्तीत ठेवण्याचा होता.” या वक्तव्यानंतर त्यांच्यावर राजकीय व सामाजिक टीकेचा भडिमार होत आहे.
कायद्यानुसार कारवाई सुरू
गृहराज्यमंत्री योगेश कदम यांनी सुरुवातीला विधानसभेत सांगितले होते की, “गायकवाड यांच्याविरोधात कुठलीही तक्रार नसल्यामुळे चौकशी करता येणार नाही.” मात्र, यावर माध्यमांनी विचारले असता मुख्यमंत्री फडणवीस यांनी ठाम भूमिका घेत, “तक्रार नसलं तरी दखलपात्र गुन्हा असेल तर पोलीस स्वतःहून कारवाई करू शकतात” असे सांगितले.
त्यांच्या स्पष्ट निर्देशांनंतर मरीन ड्राईव्ह पोलीस ठाण्याने अदखलपात्र गुन्हा दाखल केला असून, पुढील तपास सुरू आहे.
कायद्यासमोर सगळे समान
या प्रकरणामुळे एक गोष्ट अधोरेखित झाली – कोणीही कायद्याच्या वरचं नाही. मुख्यमंत्री स्वतः हस्तक्षेप करून पोलिसांना तपासाचे स्वातंत्र्य दिल्यामुळे, आमदार गायकवाड यांच्यावर कारवाईचा मार्ग मोकळा झाला आहे.
