पुण्यातील एका कार्यक्रमात उपस्थित राहिल्यानंतर मुख्यमंत्री देवेंद्र फडणवीस यांच्या पत्नी अमृता फडणवीस यांनी पुण्यावर विशेष प्रेम व्यक्त करत केलेले विधान सध्या चर्चेचा केंद्रबिंदू ठरत आहे. त्या म्हणाल्या, “पुणे हे देवेंद्रजींचं एक ‘बेबी’ आहे. मुंबई, पुणे आणि नागपूर ही त्यांच्या दृष्टीने स्वतःची मुलं आहेत,” हे विधान विशेष गाजत आहे.
अमृता फडणवीस म्हणाल्या की, “मी देवेंद्रजींना पुण्यातील समस्या सांगत असते. पुण्याची मी खूप आपली मानते. माझी आजी इथे राहते. इथे आल्यावर माहेरी आल्यासारखं वाटतं. त्यामुळे जे काही त्रुटी दिसतात, त्या मी त्यांना सांगते. आणि मला आनंद आहे की तेही पुण्याकडे तेवढ्याच प्रेमाने आणि लक्षाने पाहतात.”
त्यांच्या या विधानामुळे, पुण्यातील नागरी समस्यांवर देवेंद्र फडणवीस किती जागरूक आहेत हे पुन्हा अधोरेखित झाले आहे. पुण्याच्या वाढत्या शहरीकरणामुळे निर्माण झालेल्या समस्यांकडे त्यांनी विशेष लक्ष द्यावे, अशी अपेक्षा नागरिकांनी व्यक्त केली आहे.
“मेट्रोमुळे काही अंशी वाहतूक सुलभ झाली आहे, पण रस्त्यांची परिस्थिती, वाहतुकीची शिस्त, सार्वजनिक सुविधांची कमतरता यावर अजून काम करावं लागेल,” असं अमृता फडणवीस यांनी स्पष्ट केलं. त्यांचा हा स्पष्टवक्तेपणा उपस्थितांमध्ये विशेष कौतुकास्पद ठरला.
महिला अत्याचारावरही ठाम भूमिका: कार्यक्रमात महिलांच्या सन्मानासाठी आयोजित सत्कारप्रसंगी, राज्यातील वाढत्या महिला अत्याचाराच्या घटनांवरही अमृता फडणवीस यांनी चिंता व्यक्त केली. “हुंडाबळी, कौटुंबिक हिंसा अशा घटनांमध्ये आपण सर्वांनी आत्मपरीक्षण करणं गरजेचं आहे. आपली मुलं महिलांचा आदर करत आहेत का हे पाहणं हेही तितकंच महत्त्वाचं आहे,” असं त्यांनी स्पष्ट केलं.
त्यांनी पुढे सांगितले की, “राज्यकर्ते, पोलीस आणि न्यायपालिका आपापल्या भूमिका निभावत आहेत. पण समाजानेही सजग राहिलं पाहिजे. पीडित महिलांना मदतीचा हात पुढे करणं ही आपली जबाबदारी आहे.”
राज-उद्धव एकत्र येणार? – अमृतांचा सकारात्मक सूर: राज ठाकरे आणि उद्धव ठाकरे यांच्या संभाव्य एकत्र येण्याबद्दल विचारले असता अमृता फडणवीस म्हणाल्या, “ते एकत्र येत असतील तर आनंदाची गोष्ट आहे. नात्यांमध्ये दूरावं आलं असलं, तरी पुन्हा मिळणं हेच खरी ताकद असते.”
‘लाडकी बहीण योजना’ बंद होणार? अमृतांचा विश्वास टिकून: ‘मुख्यमंत्री माझी लाडकी बहीण योजना’ बंद होणार असल्याच्या चर्चा विरोधकांनी सुरू केल्या आहेत. यावर अमृता फडणवीस यांनी उत्तर दिलं की, “काही अपात्र महिलांना वगळलं आहे, पण योजना सुरू राहील. राज्य सरकार बहिणींसाठी हा खर्च सहन करेल.”
ठळक मुद्दे:
पुण्यावर देवेंद्र फडणवीस यांचं विशेष लक्ष
अमृता फडणवीस यांचा पुण्याशी भावनिक संबंध
महिला अत्याचारांबाबत संवेदनशील आणि स्पष्ट मत
ठाकरे बंधूंच्या एकत्र येण्यावर सकारात्मक प्रतिक्रिया
