नांदेड शहराच्या सर्वांगीण विकासासाठी उच्चस्तरीय बैठक मुंबईत संपन्न; भाविकांची नगरी होणार स्मार्ट, २५ वर्षांचा मास्टरप्लॅन तयार करण्याचे आदेश

मुंबई | महाराष्ट्रातील धार्मिक आणि ऐतिहासिक वैभव लाभलेले नांदेड शहर आता नव्या उंचीवर जाणार आहे. सह्याद्री अतिथीगृह, मुंबई येथे आज झालेल्या विशेष बैठकीत नांदेड शहराच्या सर्वांगीण विकास आराखड्याची रूपरेषा ठरवण्यात आली. शहराचा पुढील २५ वर्षांसाठीचा मास्टरप्लॅन तयार करण्याचे स्पष्ट आदेश यावेळी देण्यात आले.

नांदेड: श्रद्धा आणि वारशाचा संगम –

नांदेड हे सिख धर्माचे पवित्र तीर्थस्थान असल्याने येथे दरवर्षी देशविदेशातून लाखो भाविक भेट देतात. गुरु गोविंदसिंग महाराजांच्या समाधीचे हे स्थान असून, यामुळे धार्मिक पर्यटनास मोठा वाव आहे. त्यामुळे रस्ते, पाणी, सांडपाणी, बगीचे, पार्किंग, वाहतूक नियोजन आदी घटकांचा समावेश असलेला संपूर्ण स्मार्ट मास्टर प्लॅन तयार करणे गरजेचे असल्याचे बैठकीत सांगण्यात आले.

शहराचा “स्मार्ट प्लॅन” –

पुढील २५ वर्षांसाठी रस्ते सुधारणा, सार्वजनिक वाहतूक व्यवस्था, हरित क्षेत्रांची वाढ, पाणी व सांडपाणी व्यवस्थापन, या बाबींचा समावेश असलेला मास्टरप्लॅन तयार करण्यात येणार.

यासाठी जिल्हाधिकारी, महापालिका आयुक्त आणि एमएमआरडीएचे वरिष्ठ अधिकारी यांच्यात स्वतंत्र बैठक घेऊन कार्यवाही निश्चित करण्याचे निर्देश.

बैठकीत उपस्थित मान्यवर –

या उच्चस्तरीय बैठकीला खासदार अशोक चव्हाण, खासदार अजित गोपछेडे, नांदेडचे पालकमंत्री अतुल सावे, आमदार हेमंत पाटील, बालाजी कल्याणकर, आनंद बोंडारकर, नगरविकास विभागाचे प्रधान सचिव डॉ. गोविंदराज, एमएमआरडीएचे अतिरिक्त आयुक्त विक्रम कुमार आदी उपस्थित होते.
नांदेड जिल्हाधिकारी व महापालिका आयुक्त दूरदृश्यप्रणालीच्या माध्यमातून बैठकीत सहभागी झाले.

भाविकांसाठी सुविधा व आकर्षण वाढणार –

या विकास आराखड्यामुळे नांदेड शहर धार्मिक पर्यटनाचे केंद्र म्हणून अधिक बळकट होणार आहे. भाविकांसाठी आवश्यक सुविधा, स्वच्छता, रस्ता नेटवर्क, सुरक्षितता आणि ग्रीन झोन यामुळे शहराचा चेहरामोहरा बदलण्यास मदत होईल.

 नांदेड शहराला केवळ धार्मिक नव्हे, तर आधुनिक शहर म्हणून विकसित करण्याची प्रक्रिया या बैठकीद्वारे गतीमान झाली आहे. आगामी काळात नांदेड महाराष्ट्राच्या विकास नकाशावर एक आदर्श शहर म्हणून नावारूपाला येणार, अशी अपेक्षा व्यक्त होत आहे.