दिल्लीसह उत्तर भारतातील अनेक भागांमध्ये घनदाट धुक्याची चादर पसरली असून, त्याचा सर्वाधिक फटका हवाई वाहतुकीला बसत आहे. कमी दृश्यमानता (लो व्हिजिबिलिटी) आणि हवामानातील अचानक बदलांमुळे अनेक उड्डाणांना विलंब, तर काही उड्डाणे रद्द करण्यात आली आहेत. परिणामी विमानतळांवर प्रवाशांची मोठी गर्दी पाहायला मिळत आहे.
या पार्श्वभूमीवर एअर इंडिया आणि इंडिगो या देशातील प्रमुख विमान कंपन्यांनी प्रवाशांसाठी स्वतंत्र ट्रॅव्हल अॅडव्हायझरी जारी केली आहे. दोन्ही विमान कंपन्यांनी प्रवाशांना संयम ठेवण्याचे आवाहन करत, हवामानामुळे निर्माण झालेल्या अडचणी हळूहळू दूर केल्या जात असल्याचे स्पष्ट केले आहे.
एअर इंडिया आणि इंडिगो यांनी सांगितले की, धुक्यामुळे उड्डाणांची वेळ बदलू शकते, त्यामुळे प्रवाशांनी विमानतळावर जाण्यापूर्वी आपल्या फ्लाइटची स्थिती (फ्लाइट स्टेटस) तपासावी. तसेच, ऑनलाइन चेक-इनचा पर्याय वापरणे, अतिरिक्त वेळ हाताशी ठेवणे आणि विमानतळ कर्मचाऱ्यांच्या सूचनांचे पालन करणे आवश्यक असल्याचेही अॅडव्हायझरीत नमूद करण्यात आले आहे.
हवामान विभागाच्या माहितीनुसार, पुढील काही दिवस उत्तर भारतात थंडी आणि धुक्याचा प्रभाव कायम राहण्याची शक्यता आहे. विशेषतः पहाटे आणि सकाळच्या वेळेत दृश्यमानता अत्यंत कमी असल्याने हवाई, रेल्वे आणि रस्ते वाहतुकीवर परिणाम होण्याची शक्यता व्यक्त करण्यात येत आहे. दरम्यान, विमान कंपन्या आणि विमानतळ प्रशासनाकडून प्रवाशांच्या सुरक्षेला सर्वोच्च प्राधान्य देत परिस्थितीवर सातत्याने लक्ष ठेवले जात आहे. हवामान सुधारताच उड्डाण सेवा पूर्ववत करण्यासाठी आवश्यक ती पावले उचलली जात असल्याचेही स्पष्ट करण्यात आले आहे.
