पुणे | पुणे विमानतळावर बुधवारी (६ ऑगस्ट) एक धक्कादायक घटना घडली. पुणे ते भुवनेश्वर जाणाऱ्या एअर इंडिया एक्स्प्रेसच्या (IX 1098) विमानाला उड्डाणाच्या तयारीदरम्यान बगळ्याची जोरदार धडक बसली. या अपघातामुळे विमानाच्या इंजिनचे गंभीर नुकसान झाले असून प्राथमिक तपासात सात ब्लेड निकामी झाल्याचे निष्पन्न झाले आहे. इंजिनची दुरुस्ती होईपर्यंत हे विमान किमान चार ते पाच दिवस ‘पार्किंग बे’वरच राहणार असल्याचे अधिकाऱ्यांनी सांगितले.
दुरुस्तीचा लांबलेला कालावधी कंपनीच्या तांत्रिक पथकाने तत्काळ दुरुस्तीची कामे सुरू केली असली तरी, आवश्यक सुटे भाग आणि तांत्रिक तपासणी प्रक्रियेमुळे वेळ वाढणार आहे. अंदाजानुसार ब्लेड बदलण्यासाठी आणि इंजिनची तपासणी करण्यासाठी किमान चार दिवसांचा कालावधी लागेल.
आर्थिक फटका निश्चित या घटनेमुळे एअर इंडिया एक्स्प्रेसला मोठा आर्थिक फटका बसणार आहे. रद्द झालेल्या प्रवासी सेवा, पर्यायी विमानसेवेचा खर्च, दररोज विमानतळ प्रशासनाला द्यावे लागणारे पार्किंग शुल्क, तसेच महागड्या इंजिन दुरुस्तीचे खर्च — या सर्वांचा एकत्रित परिणाम कंपनीच्या ताळेबंदावर होणार आहे. अंदाजे नुकसान लाखोंच्या घरात जाईल, असे सूत्रांनी सांगितले.
विमानतळ वाहतुकीवरील परिणामाची शक्यता पुणे विमानतळावर एकूण १० पैकी एक ‘पार्किंग बे’ हे विमान व्यापून बसल्याने इतर विमानांच्या पार्किंग व हालचालीवर ताण येऊ शकतो. मात्र विमानतळ प्रशासनाने अद्याप नियमित वेळापत्रकावर मोठा परिणाम होणार नसल्याचे स्पष्ट केले आहे. तरीही, गर्दीच्या वेळेत पार्किंगची मर्यादित उपलब्धता ही समस्या ठरू शकते.
घटनेमागील पार्श्वभूमी विमान व पक्षी यांच्यातील धडक (Bird Strike) ही विमान वाहतुकीतील गंभीर आणि जागतिक पातळीवरील समस्या आहे. अशा अपघातांमुळे विमान कंपन्यांना दरवर्षी कोट्यवधी रुपयांचे नुकसान होते, तसेच प्रवाशांच्या सुरक्षिततेसाठी अतिरिक्त उपाययोजना कराव्या लागतात.
