पिंपरी चिंचवड अग्निशामक दलाचं आधुनिकतेकडे भक्कम पाऊल | २२० जवानांसाठी १० विशेष प्रशिक्षण अभ्यासक्रमांची घोषणा!

पिंपरी चिंचवड, ११ जुलै २०२५: पिंपरी चिंचवड शहर हे वेगाने विस्तारत असताना त्याचवेळी नैसर्गिक आणि मानवनिर्मित आपत्तींच्या घटनाही वाढत आहेत. अशा परिस्थितीत अग्निशामक दल केवळ आग विझवणारी यंत्रणा न राहता, संपूर्ण आपत्ती व्यवस्थापनात महत्त्वाची भूमिका बजावणारी आधुनिक आणि तांत्रिकदृष्ट्या सक्षम टीम असावी लागते, ही गरज ओळखून पिंपरी चिंचवड महानगरपालिकेने मोठं पाऊल उचललं आहे.

अग्निशामक दलासाठी ‘फ्युचर रेडी’ ट्रेनिंग

महानगरपालिकेच्या अग्निशामक विभागाने एकूण २२० अग्निशामक अधिकारी व कर्मचाऱ्यांसाठी १० विशेष प्रशिक्षण अभ्यासक्रम तयार केले आहेत. यामध्ये ७० अनुभवी अधिकारी व १५० नव्याने भरती झालेल्या जवानांचा समावेश असून, १८ ते ५५ वयोगटातील जवानांसाठी तांत्रिक, शारीरिक आणि मानसिक तयारीवर भर दिला जाणार आहे.

प्रशिक्षणामध्ये काय शिकवले जाणार?

🔹 झाडे कापण्यासाठी यंत्रसामग्रीचा वापर
🔹 पाण्यात अडकलेल्यांचे बचावकार्य
🔹 ड्रोनच्या साहाय्याने शोध मोहीम
🔹 उच्च उंचीवरील आणि अरुंद जागांतील बचाव
🔹 खोल पाण्यातील डायव्हिंग ऑपरेशन
🔹 K9 डॉग युनिटच्या सहकार्याने शोधकार्य
🔹 प्राथमिक उपचार, उपकरणांची देखभाल व काळजी
🔹 नैसर्गिक आणि मानवनिर्मित आपत्तीला सामोरे जाण्याची मानसिक तयारी

या प्रशिक्षणामध्ये केवळ कृती नव्हे, तर टीमवर्क, शांत मनाने निर्णय घेण्याची क्षमता आणि आधुनिक उपकरणांची अचूक हाताळणी यावरही भर दिला जाणार आहे.

 प्रशासनाचं मत:

 शेखर सिंह, आयुक्त व प्रशासक:
“शहर वाढत आहे, तशी आपत्तींची रूपंही बदलत आहेत. आमचे जवान कोणत्याही संकटात तत्पर आणि सक्षम प्रतिसाद देण्यासाठी सज्ज असायला हवेत.”

प्रदीप जांभळे पाटील, अतिरिक्त आयुक्त:
“ही फक्त अग्निशामक टीम नाही, तर ही एक प्रशिक्षित आणि आत्मविश्वासू तांत्रिक यंत्रणा असावी लागते. या प्रशिक्षणामुळे जवानांची तयारी बळकट होणार आहे.”

 मनोज लोणकर, सह आयुक्त:
“जुना अनुभव आणि नवं तंत्रज्ञान याचा योग्य समन्वय म्हणजेच प्रभावी आपत्ती व्यवस्थापन. आमचे जवान आता टीम म्हणून अधिक सक्षम होणार आहेत.”