मावळात मुसळधार पावसाचा तडाखा; पवना धरण ९९% भरले, ५,७२० क्युसेकने विसर्ग सुरू – पवना नदीला पूर, नागरिकांना सतर्कतेचा इशारा.
पिंपरी, दि. ३ ऑगस्ट : मावळ तालुक्यासह पवना धरणाच्या पाणलोट क्षेत्रात सोमवार सकाळपासून मुसळधार पाऊस सुरू असल्याने पवना धरणातील पाणीसाठा ९९ टक्क्यांवर पोहोचला आहे. वाढत्या पाण्याच्या आवकामुळे धरणाची पातळी नियंत्रित ठेवण्यासाठी सकाळी १० वाजल्यापासून पवना नदीपात्रात ५,७२० क्युसेक वेगाने पाण्याचा विसर्ग सुरू करण्यात आला आहे. या विसर्गामुळे पवना नदी दुथडी भरून वाहत असून नदीकाठच्या सखल भागांना पूराचा धोका निर्माण झाला आहे.
पवना धरणातून पिंपरी-चिंचवड शहर, एमआयडीसी परिसर, काही नगरपालिका आणि मावळ तालुक्यातील अनेक गावांना पाणीपुरवठा केला जातो. गेल्या काही दिवसांपासून सुरू असलेल्या मुसळधार पावसामुळे धरणाच्या पाणलोट क्षेत्रात मोठ्या प्रमाणात पाण्याची आवक वाढली आहे. त्यामुळे धरण जवळपास पूर्ण क्षमतेने भरले असून जलसंपदा विभागाने खबरदारीचा उपाय म्हणून विसर्ग सुरू केला आहे.
जलसंपदा विभागाच्या माहितीनुसार, घाटमाथ्यावर पावसाचा जोर कायम राहिल्यास धरणातून होणारा विसर्ग टप्प्याटप्प्याने वाढवून १५ हजार क्युसेकपर्यंत नेण्याची शक्यता आहे. त्यामुळे पवना नदीच्या पाण्याची पातळी आणखी वाढू शकते.
प्रशासनाने नदीकाठच्या सर्व नागरिकांना सतर्क राहण्याचे आवाहन केले आहे. नदीपात्रातील शेती अवजारे, कृषी पंप, जनावरे तसेच इतर साहित्य तातडीने सुरक्षित ठिकाणी हलविण्याच्या सूचना देण्यात आल्या आहेत. सततच्या पावसामुळे ओढे, नाले आणि नदीच्या पाण्याच्या पातळीत अचानक वाढ होण्याची शक्यता असल्याने नागरिकांनी नदीपात्रात जाणे टाळावे, असेही प्रशासनाने स्पष्ट केले आहे.
दरम्यान, पवना धरणातील पाणीसाठा वाढूनही पिंपरी-चिंचवड शहरातील १५ टक्के पाणी कपात अद्याप कायम ठेवण्यात आली आहे. धरणात ऑक्टोबरपर्यंत शंभर टक्के पाणीसाठा कायम राहिल्यानंतरच कपात रद्द करण्याबाबत निर्णय घेतला जाईल, असे पाणीपुरवठा विभागाने सांगितले आहे.
याशिवाय, पिंपरी-चिंचवड शहरात २५ नोव्हेंबर २०१९ पासून सुरू असलेला एक दिवसाआड पाणीपुरवठा अद्याप सुरू असून, भामा-आसखेड प्रकल्पाचे पाणी उपलब्ध होईपर्यंत ही व्यवस्था कायम राहणार असल्याचे प्रशासनाने स्पष्ट केले आहे.
प्रशासनाने नागरिकांना अफवांवर विश्वास न ठेवता अधिकृत सूचनांचे पालन करण्याचे आणि पूरस्थितीची शक्यता लक्षात घेऊन आवश्यक ती खबरदारी घेण्याचे आवाहन केले आहे
