पुणे ग्रामीण पोलिसांच्या हद्दीत घरफोडी, मारहाण, फसवणूक आणि चोरीच्या आठ घटना; लाखोंचा ऐवज लंपास!
भोरमध्ये दोन घरफोड्यांत १ लाख ९८ हजारांचे दागिने चोरीला; दौंडमध्ये ऊसतोड मजुरांच्या नावाखाली १० लाखांची फसवणूक, तर बारामतीत शोरूममधून ७.४८ लाखांची रोकड चोरीला
पुणे, दि. २८ ऑक्टोबर २०२६
पुणे ग्रामीण पोलीस दलाच्या हद्दीत घरफोडी, चोरी, मारहाण आणि आर्थिक फसवणुकीच्या आठ घटना समोर आल्या आहेत. भोर, राजगड, रांजणगाव, शिक्रापूर, जेजुरी, इंदापूर, दौंड आणि बारामती शहर पोलीस ठाण्यांत याप्रकरणी गुन्हे दाखल करण्यात आले आहेत.
भोरमध्ये घरफोडी; १ लाख १८ हजारांचे सोन्याचे दागिने चोरीला
भोर तालुक्यातील उत्रौली येथे २१ ते २६ ऑक्टोबरदरम्यान अज्ञात चोरट्यांनी घरात प्रवेश करून कपाटातील १ लाख १८ हजार २० रुपये किमतीचे सोन्याचे दागिने चोरून नेले. यामध्ये तीन तोळ्यांची मोहनमाळ, सोन्याचे झुबे, बदाम, अंगठी आणि दहा सोन्याच्या मण्यांचा समावेश आहे. मालन संजय शिवतरे (वय ४६) यांच्या फिर्यादीवरून भोर पोलीस ठाण्यात गुन्हा क्रमांक २४९/२०२६ दाखल करण्यात आला असून महिला पोलीस उपनिरीक्षक खोत तपास करीत आहेत.
राजगड पोलीस हद्दीत ८० हजारांचे दागिने लंपास
भोर तालुक्यातील धांगवडी येथे २७ ऑक्टोबर रोजी सकाळी ९ ते सायंकाळी ६ वाजण्याच्या दरम्यान अज्ञात चोरट्याने घराचा मागील दरवाजा तोडून प्रवेश केला. कपाटातील सोन्याचे गंठण, कानातील फुले आणि रिंगा असा एकूण ८० हजार रुपयांचा ऐवज चोरीला गेला. संतोष रामचंद्र वीटकर (वय ४३) यांच्या फिर्यादीवरून राजगड पोलीस ठाण्यात गुन्हा क्रमांक ४०३/२०२६ दाखल करण्यात आला आहे. पोलीस हवालदार निंबाळकर तपास करीत आहेत.
रांजणगाव गणपती येथील फंडवस्ती रस्त्यावर २७ ऑक्टोबर रोजी सायंकाळी ५.१५ वाजता अतुल दिलीप पाचुंदकर (वय ३६) यांना वाहन पुढे घेण्याच्या कारणावरून मारहाण करण्यात आली. आरोपींनी शिवीगाळ करून लोखंडी गजाने व हातातील कड्याने मारहाण केली तसेच त्यांच्या स्विफ्ट डिझायर कारच्या काचा फोडल्या.
याप्रकरणी गौरव बोऱ्हाडे, विजय भालेराव, कुणाल पाटील, रोहित बहिरट आणि दोन अनोळखी व्यक्तींविरोधात रांजणगाव पोलीस ठाण्यात गुन्हा क्रमांक ५२५/२०२६ दाखल करण्यात आला आहे. पोलीस हवालदार चव्हाण तपास करीत आहेत.
शिक्रापूरमध्ये कौटुंबिक वादातून डोक्यात दगड मारून जखमी
शिरूर तालुक्यातील वढू बुद्रुक येथे २७ ऑक्टोबर रोजी दुपारी लहान मुलाला मारहाण करण्याच्या कारणावरून नातेवाइकांमध्ये वाद झाला. या वादात शहाजी बाळू पांडे (वय ३८) यांच्या डोक्यात दगड मारून त्यांना जखमी करण्यात आल्याची तक्रार आहे.
याप्रकरणी ओम विजय पांडे आणि अक्षय मारुती पांडे यांच्याविरोधात शिक्रापूर पोलीस ठाण्यात गुन्हा क्रमांक ९४५/२०२६ दाखल करण्यात आला आहे. पोलीस हवालदार सरोदे तपास करीत आहेत
जेजुरी पोलीस हद्दीत पती-पत्नीला काठीने मारहाण
पुरंदर तालुक्यातील बेलसर, भोंगळे वस्ती येथे २४ ऑक्टोबर रोजी सायंकाळी शेळीवरून झालेल्या वादातून रोहिणी दत्तात्रय जगताप (वय ५०) आणि त्यांचे पती दत्तात्रय जगताप यांना शिवीगाळ, दमदाटी व जिवे मारण्याची धमकी देऊन काठीने मारहाण करण्यात आली. दोघांच्याही डोक्याला दुखापत झाली.
याप्रकरणी सूर्यकांत ऊर्फ बाळू दत्तात्रय जगताप आणि उषा सूर्यकांत जगताप यांच्याविरोधात जेजुरी पोलीस ठाण्यात गुन्हा क्रमांक ३३३/२०२६ दाखल करण्यात आला आहे. महिला पोलीस उपनिरीक्षक राणे तपास करीत आहेत.
इंदापूरमध्ये कोजागिरीच्या जेवणावेळी मारहाण
इंदापूर तालुक्यातील पिटेवाडी येथे २५ ऑक्टोबर रोजी रात्री कोजागिरी पौर्णिमेनिमित्त आयोजित जेवणाच्या कार्यक्रमात वाद झाला. ज्ञानेश्वर पोपट क्षीरसागर (वय ३२) यांना आरोपी लखन अनंता राऊत याने लाकडी काठीने डोक्यात मारहाण केली, तर अनंता राऊत याने लाथाबुक्क्यांनी मारहाण केल्याची फिर्याद आहे.
याप्रकरणी इंदापूर पोलीस ठाण्यात गुन्हा क्रमांक ७०८/२०२६ दाखल करण्यात आला असून पोलीस हवालदार नवले तपास करीत आहेत.
दौंडमध्ये ऊसतोड मजूर पुरवण्याच्या नावाखाली १० लाख १० हजारांची फसवणूक
दौंड तालुक्यातील मलठण येथील शेतकरी दादा पांडुरंग येवले (वय ३२) यांना ऊसतोड मजूर पुरवण्याचे आश्वासन देऊन आर्थिक फसवणूक करण्यात आल्याचा प्रकार उघडकीस आला आहे.
जून २०२५ मध्ये ऊसतोड मुकादम शालीकराम रमेश जाधव यांच्यासोबत आठ कोयते, १६ ऊसतोड मजूर, आठ बैलगाड्या आणि १६ बैलजोड्यांसाठी १० लाख १० हजार ५०० रुपयांचा व्यवहार ठरला होता. फिर्यादीने बँक खात्यात आठ लाख रुपये आणि फोनपेवर दोन लाख दहा हजार रुपये पाठवले. मात्र पैसे घेऊनही मजूर पुरवले नसल्याची तक्रार आहे.
याप्रकरणी दौंड पोलीस ठाण्यात गुन्हा क्रमांक ८१७/२०२६ दाखल करण्यात आला असून ग्रेड पोलीस उपनिरीक्षक खाडे तपास करीत आहेत.
बारामतीत मोटर्स शोरूममधून ७ लाख ४८ हजारांची रोकड चोरीला
बारामती शहरातील खंडोबानगर, नेवसेवस्ती, मोरगाव रस्त्यावरील शर्वरी मोटर्स शोरूममध्ये २५ ऑक्टोबर सायंकाळी ६ ते २६ ऑक्टोबर सकाळी १० वाजण्याच्या दरम्यान चोरी झाली.
अज्ञात चोरट्याने शोरूममध्ये प्रवेश करून वरच्या मजल्यावरील ज्योती सोनवणे यांच्या केबिनमधील टेबलाच्या कपाटात ठेवलेली ७ लाख ४८ हजार ४८५ रुपयांची रोकड चोरून नेली.
शोरूमचे व्यवस्थापक गणेश दत्तू वाघमारे (वय ३५) यांच्या फिर्यादीवरून बारामती शहर पोलीस ठाण्यात गुन्हा क्रमांक ४८९/२०२६ दाखल करण्यात आला आहे. पोलीस हवालदार काळे तपास करीत आहेत.
पुणे ग्रामीण पोलिसांकडून तपास सुरू : या आठ घटनांमध्ये दोन घरफोड्या, चार मारहाणीच्या घटना, एक आर्थिक फसवणूक आणि एका मोठ्या रोकड चोरीचा समावेश आहे. घरफोडी व रोकड चोरीत एकूण ९ लाख ४६ हजार ५०५ रुपयांचा ऐवज चोरीला गेला असून ऊसतोड मजूर पुरवण्याच्या व्यवहारात आणखी १० लाख १० हजार ५०० रुपयांची फसवणूक झाल्याची तक्रार आहे. संबंधित पोलीस ठाण्यांकडून पुढील तपास सुरू आहे.
