महाराष्ट्रात पुन्हा निवडणुकीची रणधुमाळी! विधान परिषदेच्या १६ जागांसाठी निवडणूक जाहीर; १८ जूनला मतदान, २२ जूनला मतमोजणी.
मुंबई : महाराष्ट्राच्या राजकारणात पुन्हा एकदा निवडणुकीचे वारे वाहू लागले आहेत. राज्यातील विधान परिषदेच्या स्थानिक स्वराज्य संस्था मतदारसंघांतील १६ जागांसाठी निवडणूक आयोगाने द्वैवार्षिक निवडणुकीची अधिकृत घोषणा केली आहे. या निवडणुकांसाठी १८ जून २०२६ रोजी मतदान होणार असून २२ जून रोजी मतमोजणी केली जाणार आहे. या घोषणेनंतर संबंधित मतदारसंघांमध्ये तत्काळ आचारसंहिता लागू झाली आहे.
या निवडणुका राज्यातील राजकीय समीकरणांसाठी अत्यंत महत्त्वाच्या मानल्या जात आहेत. स्थानिक स्वराज्य संस्थांमधील नगरसेवक, जिल्हा परिषद सदस्य, पंचायत समिती सदस्य आणि अन्य लोकप्रतिनिधी या निवडणुकीत मतदान करणार आहेत. त्यामुळे प्रत्येक पक्षासाठी ही प्रतिष्ठेची लढत ठरणार आहे.
उमेदवारी अर्जाचे वेळापत्रक
निवडणूक आयोगाने जाहीर केलेल्या कार्यक्रमानुसार:
उमेदवारी अर्ज दाखल करण्यास सुरुवात : २५ मे २०२६
अर्ज दाखल करण्याची अंतिम तारीख : १ जून २०२६
अर्जांची छाननी : २ जून २०२६
मतदान : १८ जून २०२६
मतमोजणी : २२ जून २०२६
कोणत्या १६ मतदारसंघांत होणार निवडणूक?
या निवडणुका पुढील स्थानिक स्वराज्य संस्था मतदारसंघांमध्ये होणार आहेत:
पुणे
ठाणे
नाशिक
सोलापूर
अहिल्यानगर
जळगाव
सांगली-सातारा
नांदेड
यवतमाळ
भंडारा-गोंदिया
रायगड-रत्नागिरी-सिंधुदुर्ग
वर्धा-चंद्रपूर-गडचिरोली
अमरावती
धाराशिव-लातूर-बीड
परभणी-हिंगोली ,छत्रपती संभाजीनगर-जालना
निवडणूक लांबण्यामागचे कारण
स्थानिक स्वराज्य संस्थांच्या निवडणुका वेळेवर न झाल्यामुळे या मतदारसंघांतील विधान परिषद निवडणुका देखील रखडल्या होत्या. नुकत्याच या निवडणुका पार पडल्याने आता विधान परिषदेच्या १६ जागांसाठीचा मार्ग मोकळा झाला आहे.
राजकीय पक्षांसाठी प्रतिष्ठेची लढत
या निवडणुकांमध्ये सत्ताधारी महायुती आणि विरोधी महाविकास आघाडी यांच्यात जोरदार सामना रंगण्याची शक्यता आहे. स्थानिक स्वराज्य संस्थांमध्ये कोणत्या पक्षाचे किती बळ आहे, याची खरी परीक्षा या निवडणुकीत होणार आहे. त्यामुळे उमेदवार निवड, पक्षांतर आणि स्थानिक राजकीय समीकरणांना मोठे महत्त्व प्राप्त झाले आहे.
नुकतेच १० सदस्यांचा शपथविधी
यापूर्वी विधानसभा सदस्यांच्या मतदानातून निवडल्या जाणाऱ्या ९ जागांवरील निवडणूक बिनविरोध झाली होती. तसेच एका पोटनिवडणुकीत विजयी झालेल्या सदस्यासह एकूण १० सदस्यांचा शपथविधी विधान भवनात पार पडला. विधान परिषदेचे सभापती राम शिंदे यांनी सदस्यांना शपथ दिली. यावेळी मुख्यमंत्री देवेंद्र फडणवीस उपमुख्यमंत्री एकनाथ शिंदे आणि सुनेत्रा अजित पवार उपस्थित होते.
राज्याच्या राजकारणावर परिणाम
विधान परिषद निवडणुकीचे निकाल हे केवळ जागांची संख्या ठरवणारे नसून राज्यातील आगामी राजकीय समीकरणांची दिशा दाखवणारे असतात. स्थानिक पातळीवरील पक्षसंघटना किती मजबूत आहे आणि जनाधार कोणाच्या बाजूने आहे, याचे स्पष्ट चित्र या निवडणुकांमधून समोर येणार आहे. त्यामुळे १८ जूनकडे संपूर्ण राज्याचे राजकीय लक्ष लागले आहे.
