सार्वजनिक आरोग्य क्षेत्रात नवा अध्याय; CIFF सोबत महाराष्ट्राचा सामंजस्य करार, सामाजिक बदलांना गती

मुंबई | महाराष्ट्राच्या सार्वजनिक आरोग्य क्षेत्रात एक महत्त्वपूर्ण टप्पा गाठण्यात आला असून, लोककेंद्रित आणि अधिक परिणामकारक आरोग्य सेवा देण्यासाठी राज्य शासनाच्या सार्वजनिक आरोग्य विभागाने Children’s Investment Fund Foundation (CIFF), युनायटेड किंगडमसोबत सामंजस्य करार (MoU) केला आहे. या करारासाठी मुख्यमंत्री Devendra Fadnavis यांनी विशेष पुढाकार घेतला.

या करारावर सार्वजनिक आरोग्य विभागाचे प्रधान सचिव डॉ. निपुण विनायक, उपसचिव चंद्रकांत विभुते, तसेच CIFF कडून डॉ. हेमांग शाह व डॉ. अस्मिता जैन यांच्या उपस्थितीत स्वाक्षऱ्या करण्यात आल्या. यावेळी धोरणात्मक सल्लागार व तज्ज्ञही उपस्थित होते.

मुख्यमंत्री फडणवीस यांनी सांगितले की, या भागीदारीतून सामाजिक व वर्तन बदल (Social and Behaviour Change Communication) उपक्रम अधिक नाविन्यपूर्ण, संशोधनाधारित आणि परिणामकारक पद्धतीने राबवले जातील. समुदायाचा सहभाग वाढवणे, प्रभावी संवाद साधणे आणि आरोग्यविषयक सकारात्मक सवयी विकसित करणे यावर विशेष भर दिला जाणार आहे. हा उपक्रम विशेषतः माता व बाल आरोग्य, पोषण, लसीकरण, स्वच्छता आणि प्रतिबंधात्मक आरोग्यसेवा या क्षेत्रांमध्ये महत्त्वाची भूमिका बजावणार आहे. ग्रामीण व दुर्गम भागांमध्ये राहणाऱ्या वंचित घटकांपर्यंत आरोग्य सेवा आणि माहिती पोहोचवण्यासाठी हा करार उपयुक्त ठरणार आहे.

या सहकार्याद्वारे आधुनिक तंत्रज्ञान, डिजिटल माध्यमे आणि स्थानिक स्तरावरील जनजागृती मोहिमा यांचा प्रभावी वापर करून आरोग्यविषयक सवयींमध्ये सकारात्मक बदल घडवून आणण्याचा प्रयत्न केला जाणार आहे. तज्ज्ञांच्या मते, या करारामुळे राज्यातील राष्ट्रीय आरोग्य कार्यक्रमांची अंमलबजावणी अधिक प्रभावी होईल आणि आरोग्यसेवांमध्ये पारदर्शकता व गुणवत्ताही वाढेल. दीर्घकालीन दृष्टीकोनातून हा उपक्रम राज्यातील नागरिकांच्या आरोग्यात लक्षणीय सुधारणा घडवून आणू शकतो.

सार्वजनिक आरोग्य विभागानेही हा करार आरोग्य क्षेत्रातील ‘गेमचेंजर’ ठरणार असल्याचे नमूद केले असून, या उपक्रमातून सामाजिक वर्तनातील सकारात्मक बदलांमुळे महाराष्ट्र अधिक निरोगी आणि सक्षम बनण्याची अपेक्षा व्यक्त करण्यात आली आहे.