राजस्थानची राजधानी Jaipur येथे खाद्यपदार्थ तयार करताना कथितरित्या हानिकारक व दूषित तेलाचा वापर झाल्याच्या प्रकरणात मोठी घडामोड झाली आहे. जिल्हा ग्राहक आयोग, जयपूर-द्वितीय यांनी या संदर्भात McDonald’s चे व्यवस्थापकीय संचालक राजीव रंजन तसेच ब्रँड अॅम्बेसेडर अभिनेते Ranveer Singh आणि Kartik Aaryan यांना नोटीस बजावली आहे. संबंधितांना २३ मार्चपर्यंत उत्तर सादर करण्याचे निर्देश देण्यात आले आहेत.
आयोगाचे अध्यक्ष ग्यारसी लाल मीणा यांनी गौरव तिवारी यांच्या परिवादावर हा आदेश दिला. तक्रारीनुसार, ९ फेब्रुवारी रोजी अन्न सुरक्षा आयुक्तालयाच्या पथकाने जयपूरमधील मॅकडोनाल्ड्स रेस्टॉरंटवर अचानक छापा टाकला. तपासणीदरम्यान दूषित खाद्य तेलात फ्रेंच फ्राइज तसेच नॉनव्हेज खाद्यपदार्थ तयार केले जात असल्याचे आढळल्याचा आरोप करण्यात आला आहे.
तक्रारदाराने या प्रकारामुळे ग्राहकांच्या आरोग्याशी खेळ झाल्याचा दावा करत ५० लाख रुपयांच्या नुकसानभरपाईची मागणी केली आहे. ग्राहकांची दिशाभूल करणाऱ्या जाहिराती आणि ब्रँड अॅम्बेसेडरच्या प्रचारामुळे उत्पादनावर विश्वास ठेवला जातो, त्यामुळे जबाबदारी निश्चित व्हावी, असेही तक्रारीत नमूद करण्यात आले आहे.
दरम्यान, संबंधित प्रकरणात मॅकडोनाल्ड्स व्यवस्थापनाने अधिकृत भूमिका अद्याप स्पष्ट केलेली नसली तरी, अन्न सुरक्षेच्या सर्व नियमांचे पालन केले जाते, असा दावा कंपनीकडून पूर्वी करण्यात आला होता. आयोगासमोर सादर होणाऱ्या उत्तरानंतर पुढील सुनावणी होणार आहे.
या प्रकरणामुळे सोशल मीडियावरही चर्चा रंगली असून, ग्राहकांनी अन्नसुरक्षा आणि गुणवत्तेबाबत अधिक कडक नियमांची मागणी केली आहे. ब्रँड अॅम्बेसेडर म्हणून सेलिब्रिटींची जबाबदारी काय असावी, यावरही वाद सुरू झाला आहे. आयोगाच्या पुढील सुनावणीकडे सर्वांचे लक्ष लागले असून, या निर्णयाचा परिणाम जाहिरात आणि खाद्य उद्योगावर होण्याची शक्यता व्यक्त केली जात आहे.
