बांग्लादेशमध्ये अलिकडच्या काळात घडलेल्या दीपू चंद्र दास आणि अमृत मंडल यांच्या निर्घृण लिंचिंगच्या घटनांनंतर तेथील हिंदू समाजामध्ये भीतीचे वातावरण पसरले आहे. वाढत्या हिंसाचार, जमावाकडून होणाऱ्या हल्ल्यांमुळे आणि सातत्याने मिळणाऱ्या धमक्यांमुळे अनेक हिंदू कुटुंबे असुरक्षिततेच्या छायेखाली जगत असल्याचे चित्र समोर आले आहे.
या पार्श्वभूमीवर, बांग्लादेशमधील पीडित हिंदूंनी “कृपया सीमा उघडा, आम्हाला वाचवा” अशी भावनिक साद घालत भारत सरकारकडे थेट मदतीची मागणी केली आहे. भीड आणि कट्टरपंथी गटांच्या दहशतीमुळे जीव धोक्यात असल्याचा आरोप करत, सुरक्षिततेसाठी भारतात आश्रय देण्याची विनंती अनेकांनी केली आहे.
स्थानिक सूत्रांच्या माहितीनुसार, काही भागांमध्ये हिंदूंच्या घरांवर हल्ले, दुकाने फोडणे, धमकावणे आणि सामाजिक बहिष्काराचे प्रकार वाढले आहेत. यामुळे महिला, वृद्ध आणि लहान मुलांमध्ये प्रचंड दहशत पसरली आहे. अनेक कुटुंबे आपली गावे सोडण्याच्या तयारीत असल्याचेही सांगितले जात आहे.
या तणावपूर्ण वातावरणात बांग्लादेश राष्ट्रवादी पार्टी (BNP) चे नेते तारिक रहमान यांच्या सक्रिय राजकीय प्रवेशामुळे परिस्थिती आणखी चिघळण्याची भीती व्यक्त केली जात आहे. तारिक रहमान यांची ओळख कट्टर भूमिका असलेला नेता म्हणून असून, त्यांच्या प्रभावामुळे अल्पसंख्याकांवरील हल्ले वाढू शकतात, अशी चिंता व्यक्त होत आहे.
दरम्यान, भारतातील विविध मानवाधिकार संघटना आणि सामाजिक कार्यकर्त्यांनीही या प्रकरणाची दखल घेतली असून, भारत सरकारने राजनैतिक पातळीवर हस्तक्षेप करावा आणि बांग्लादेशातील हिंदू अल्पसंख्याकांच्या सुरक्षेसाठी ठोस पावले उचलावीत, अशी मागणी केली जात आहे. सीमावर्ती भागांमध्ये मानवीय मदत आणि सुरक्षित आश्रयाची व्यवस्था करण्याबाबत चर्चा सुरू असल्याचेही संकेत मिळत आहेत.
तज्ज्ञांच्या मते, ही केवळ एका देशातील अंतर्गत बाब न राहता मानवी हक्कांचा गंभीर प्रश्न बनत चालली आहे. योग्य वेळी हस्तक्षेप न झाल्यास परिस्थिती आणखी गंभीर होऊ शकते, असा इशाराही दिला जात आहे.
