ढाका | बांग्लादेशमध्ये इंकलाब मंचचे प्रवक्ते शरीफ उस्मान हादी यांच्या मृत्यूनंतर परिस्थिती अधिकच चिघळली असून राजधानी ढाकासह अनेक शहरांमध्ये तणावाचे वातावरण कायम आहे. ठिकठिकाणी जाळपोळ, दगडफेक आणि तोडफोडीच्या घटना समोर येत असून कायदा-सुव्यवस्थेचा प्रश्न गंभीर बनला आहे. सुरक्षा यंत्रणा सतर्क असून संवेदनशील भागांमध्ये अतिरिक्त बंदोबस्त तैनात करण्यात आला आहे.
मिळालेल्या माहितीनुसार, उस्मान हादी यांचे पार्थिव सिंगापूरहून ढाकामध्ये दाखल झाले आहे. त्यांच्या निधनानंतर समर्थकांकडून मोठ्या प्रमाणावर संताप व्यक्त केला जात असून विविध संघटना आणि गट रस्त्यावर उतरल्याचे चित्र दिसत आहे. या पार्श्वभूमीवर राजधानीत शाळा-महाविद्यालये आणि सार्वजनिक ठिकाणी कडक सुरक्षा व्यवस्था लागू करण्यात आली आहे.
ढाका विद्यापीठ केंद्रीय विद्यार्थी संघटना (डुक्सू)च्या नेत्या फातिमा तस्नीम जुमा यांनी शुक्रवारी माहिती देताना सांगितले की, हादी यांच्या कुटुंबियांच्या इच्छेनुसार त्यांचे दफन बांग्लादेशचे राष्ट्रीय कवी काजी नजरुल इस्लाम यांच्या समाधीच्या शेजारी करण्यात येणार आहे. हा निर्णय भावनिक आणि राजकीय दृष्टिकोनातून अत्यंत संवेदनशील मानला जात आहे.
भारतविरोधी वक्तव्यांसाठी ओळखले जाणारे शरीफ उस्मान हादी हे इंकलाब मंचचे प्रमुख चेहरे होते. त्यांच्या मृत्यूमुळे देशातील राजकीय वातावरण तापले असून विविध गटांकडून तीव्र प्रतिक्रिया उमटत आहेत. काही ठिकाणी हिंसक निदर्शने होत असल्याने सामान्य नागरिकांमध्ये भीतीचे वातावरण पसरले आहे.
विश्लेषकांच्या मते, राष्ट्रीय कवी काजी नजरुल इस्लाम यांच्या शेजारी दफन करण्याचा निर्णय बांग्लादेशच्या राजकारणात आणि समाजात नवा वाद निर्माण करू शकतो. काजी नजरुल इस्लाम हे बांग्लादेशच्या सांस्कृतिक आणि राष्ट्रीय अस्मितेचे प्रतीक मानले जातात. त्यामुळे या निर्णयावर संमिश्र प्रतिक्रिया उमटण्याची शक्यता आहे. दरम्यान, बांग्लादेश सरकारकडून नागरिकांना शांतता राखण्याचे आवाहन करण्यात आले असून हिंसाचाराला चिथावणी देणाऱ्यांवर कठोर कारवाईचा इशारा देण्यात आला आहे. परिस्थितीवर सतत लक्ष ठेवले जात असून पुढील काही दिवस देशासाठी अत्यंत महत्त्वाचे ठरणार असल्याचे राजकीय निरीक्षकांचे मत आहे.
