देशाच्या उत्तर भागातील पर्वतरांगांमध्ये सुरू असलेल्या पावसामुळे आणि काही ठिकाणी हिमवृष्टीमुळे आता मैदानी भागातही थंडीचा जोर वाढण्याची शक्यता वर्तवण्यात येत आहे. हवामानातील या बदलाचा थेट परिणाम उत्तर भारतासह मध्य आणि पूर्व भारतातील अनेक राज्यांवर होणार असून, दिल्ली, उत्तर प्रदेश, राजस्थान, हरियाणा, पंजाबसह तब्बल 15 राज्यांमध्ये शीतलहरीचा अलर्ट जारी करण्यात आला आहे.
हवामान तज्ज्ञांच्या माहितीनुसार, पश्चिम विक्षोभ सक्रिय झाल्यामुळे हिमालयीन भागात पाऊस व बर्फवृष्टी होत आहे. यामुळे थंड वारे मैदानी भागाकडे वाहू लागले असून, किमान तापमानात लक्षणीय घट होण्याची शक्यता आहे. अनेक ठिकाणी रात्री आणि पहाटेच्या वेळेस दाट धुके पडण्याचीही शक्यता वर्तवली जात आहे, ज्याचा परिणाम रस्ते, रेल्वे आणि हवाई वाहतुकीवर होऊ शकतो.
दिल्ली-एनसीआर, पश्चिम उत्तर प्रदेश आणि हरियाणामध्ये पुढील काही दिवसांत थंडीचा कडाका अधिक जाणवणार आहे. सकाळी आणि संध्याकाळी थंड वारे वाहतील, तर ग्रामीण भागात गारठा वाढण्याची शक्यता आहे. शेतकऱ्यांनी पिकांची काळजी घ्यावी, तसेच नागरिकांनी थंडीपासून संरक्षणासाठी आवश्यक खबरदारी घ्यावी, असे आवाहन हवामान विभागाकडून करण्यात आले आहे.
तज्ज्ञांच्या मते, ही शीतलहरीची स्थिती काही दिवस कायम राहू शकते. विशेषतः वृद्ध, लहान मुले आणि आजारी व्यक्तींनी अधिक दक्षता घेणे गरजेचे आहे. गरज नसताना पहाटे किंवा रात्री उघड्यावर जाणे टाळावे, तसेच उबदार कपड्यांचा वापर करावा, असा सल्ला प्रशासनाकडून देण्यात आला आहे.
