मुंबईलगतच्या ठाणे शहरातील नागरिकांसाठी दिलासादायक आणि भविष्यातील वाहतूक व्यवस्थेला नवी दिशा देणारी बातमी समोर आली आहे. ठाणे शहरात लवकरच स्वतंत्र ‘रिंग मेट्रो’ प्रकल्प सुरू होणार असून ही मेट्रो शहराच्या अंतर्गत भागांना थेट जोडणार आहे. सुमारे २९ किलोमीटर लांबीचा हा सर्कुलर मेट्रो मार्ग ठाणेकरांच्या दैनंदिन प्रवासात मोठा बदल घडवून आणणार आहे.
मुंबईत मेट्रो नेटवर्क मोठ्या प्रमाणात विस्तारल्यानंतर प्रवास अधिक वेगवान आणि सोयीस्कर झाला आहे. त्याच धर्तीवर आता ठाणे शहरासाठी स्वतंत्र मेट्रो नेटवर्क उभारण्याचा निर्णय घेण्यात आला आहे. या रिंग मेट्रोमुळे ठाण्याच्या मुख्य तसेच अंतर्गत परिसरातील वाहतूक कोंडी कमी होणार असून खासगी वाहनांवरील अवलंबित्वही घटणार आहे.
महत्त्वाची बाब म्हणजे, या प्रकल्पाला ऑगस्ट २०२४ मध्येच केंद्र सरकारची मंजुरी मिळाली आहे. पंतप्रधान नरेंद्र मोदी यांनी ठाणे रिंग मेट्रो रेल प्रकल्पाच्या कॉरिडोरला हिरवा कंदील दिला होता. हा मेट्रो मार्ग सर्कुलर स्वरूपाचा असल्याने शहरातील विविध भाग एकमेकांशी जलदगतीने जोडले जाणार आहेत.
या मेट्रो प्रकल्पात दोन प्रमुख मेट्रो लाईन्सचा समावेश असणार असून त्यांना ठाणे रेल्वे स्टेशनसह इतर महत्त्वाच्या रेल्वे स्थानकांशी थेट कनेक्शन दिले जाणार आहे. त्यामुळे लोकल ट्रेन, बस आणि मेट्रो यांमध्ये सहज इंटरचेंज उपलब्ध होईल. कार्यालयीन कर्मचारी, विद्यार्थी, व्यापारी तसेच ज्येष्ठ नागरिकांना याचा मोठा फायदा होणार आहे.
रिंग मेट्रो प्रकल्पामुळे ठाणे शहरातील शहरी वाहतूक व्यवस्था अधिक सक्षम होणार असून प्रदूषणात घट, वेळेची बचत आणि सुरक्षित प्रवास हे प्रमुख लाभ मिळणार आहेत. तसेच, मेट्रो मार्गालगतच्या परिसरांचा विकास वेगाने होण्याची शक्यता असून रिअल इस्टेट, व्यापार आणि रोजगारनिर्मितीलाही चालना मिळेल. ठाणे शहराला ‘स्मार्ट सिटी’कडे नेणारा हा प्रकल्प मानला जात असून, मेट्रो सेवा नेमकी कधी सुरू होणार याकडे आता ठाणेकरांचे लक्ष लागले आहे. आगामी काळात प्रकल्पाच्या अंमलबजावणीचे टप्पे आणि वेळापत्रक जाहीर होण्याची अपेक्षा आहे.
