दिवाळीसारख्या सणासुदीच्या काळात नागरिक सणांच्या तयारीत मग्न असताना, पुणे ग्रामीण पोलिसांनी अत्यंत कुशलतेने कारवाई करत घरफोडीचे गुन्हे करणारा रेकॉर्डवरील सराईत चोरटा जेरबंद केला आहे. या कारवाईत पोलिसांनी तीन घरफोडीचे गुन्हे उघडकीस आणत तब्बल १४ लाख ३७ हजार ६५० रुपयांचा मुद्देमाल हस्तगत केला आहे. यात १६ तोळे सोन्याचे दागिने, ८४१ ग्रॅम चांदीचे दागिने, रोख रक्कम व मोटारसायकल यांचा समावेश आहे.
ही धडक कारवाई स्थानिक गुन्हे शाखा (L.C.B) व नारायणगाव पोलीस स्टेशन, पुणे ग्रामीण यांनी संयुक्तपणे केली आहे. ही मोहीम पोलीस अधीक्षक पुणे ग्रामीण यांच्या मार्गदर्शनाखाली राबविण्यात आली.
गुन्ह्याची पार्श्वभूमी:
१४ ऑक्टोबर २०२५ रोजी पहाटे नारायणगाव येथील विटेमळा परिसरात घरफोडीची घटना घडली होती. फिर्यादी विष्णू भागूजी सांगडे (वय ६२) यांनी दिलेल्या माहितीनुसार, ते काकड आरतीसाठी मंदिरात गेल्यानंतर अज्ञात चोरट्याने त्यांच्या घराचे कुलूप तोडून आत प्रवेश करून ११ लाख २० हजार रुपयांचे सोन्याचे व चांदीचे दागिने चोरी करून नेले.
तपास आणि सीसीटीव्ही पुरावे:
गुन्ह्याच्या अनुषंगाने पोलिसांनी परिसरातील सीसीटीव्ही फुटेज तपासले असता काळ्या रंगाच्या मोटारसायकलवर संशयित व्यक्ती दिसून आली. ही मोटारसायकल चाकणच्या दिशेने जाताना दिसली, त्यामुळे तपास पथकाने त्या दिशेने शोधमोहीम राबवली.
गोपनीय माहिती आणि सापळा:
तपासादरम्यान पोलिस अंमलदार अक्षय नवले यांना गोपनीय माहिती मिळाली की विशाल दत्तात्रय तांदळे (वय २८, रा. मंचर, ता. आंबेगाव, जि. पुणे) हा रेकॉर्डवरील गुन्हेगार असून तो या चोरीत सामील आहे. त्याच्याकडे सीबीझेड मोटारसायकल आहे, जी सीसीटीव्ही फुटेजमध्ये दिसली होती.
ही माहिती मिळताच पोलिसांनी नारायणगाव परिसरात सापळा रचला आणि आरोपीला मोटारसायकलसह अटक केली. चौकशीत आरोपीने गुन्ह्याची कबुली दिली असून त्याने अशाच प्रकारे आणखी दोन घरफोड्या केल्याचे उघड झाले आहे. आरोपीवर यापूर्वी तब्बल २८ मालमत्ता चोरीचे गुन्हे नोंद आहेत.
मुद्देमाल वसुली:
