जयपूर : राजस्थानमधील जयपूर येथे मोठी धक्कादायक घटना समोर आली आहे. जयपूर सेशन कोर्टला बॉम्बने उडविण्याची धमकी मिळाल्याने संपूर्ण न्यायालय परिसरात भीतीचं आणि तणावाचं वातावरण निर्माण झालं आहे. मिळालेल्या माहितीनुसार, एका अज्ञात व्यक्तीने फोनवरून ही धमकी दिल्याची माहिती समोर आली असून, पोलिस आणि सुरक्षा यंत्रणांना तत्काळ सतर्क करण्यात आलं आहे.
धमकी मिळताच जयपूर पोलिसांनी कोर्ट परिसरात मोठ्या प्रमाणात सुरक्षा वाढवली आहे. संपूर्ण परिसराची तपासणी करण्यात येत आहे. बॉम्ब स्क्वॉड आणि डॉग स्क्वॉडच्या मदतीने सखोल चौकशी सुरू आहे. नागरिक आणि न्यायालयात उपस्थित असलेल्या कर्मचाऱ्यांना सुरक्षित ठिकाणी हलविण्यात आले आहे.
या घटनेमुळे शहरातील पोलिस दल पूर्ण सतर्क झालं आहे. गुन्हे शाखा आणि सायबर विभाग या धमकीच्या मागील सूत्रांचा शोध घेत आहेत. ही धमकी खोटी की खरी, याचा तपास सुरू आहे. दरम्यान, या घटनेने राज्यभरात खळबळ माजली असून, लोकांमध्ये भीतीचे वातावरण आहे.
जयपूर पोलिस आयुक्तांनी सांगितले की, “धमकी गंभीर आहे, आम्ही सर्व सुरक्षा उपाययोजना करत आहोत. कोणत्याही प्रकारचा धोका नागरिकांना होऊ देणार नाही.”
