बॉलीवूडचे महानायक अमिताभ बच्चन आणि प्रसिद्ध निर्माता आनंद पंडित यांच्यातील मैत्रीचे आणि विश्वासाचे नाते आज संपूर्ण चित्रपटसृष्टीत चर्चेचा विषय बनले आहे. इतकेच नव्हे तर अमिताभ बच्चन यांनी आनंद पंडित यांच्या दोन प्रादेशिक चित्रपटांमध्ये विनामूल्य काम केले आहे, ज्यामुळे त्यांच्या नात्यातील स्नेह आणि आदराचे बंध अजून घट्ट झाले आहेत.
आता अशी चर्चा आहे की, पंडित यांच्या आगामी ‘सरकार-४’ या चित्रपटासाठीही बिग बी सोबत चर्चा सुरू आहे. जर सर्व काही सुरळीत पार पडले, तर अमिताभ बच्चन नव्या अवतारात पुन्हा एकदा मोठ्या पडद्यावर झळकतील. आनंद पंडित यांनी ‘दैनिक भास्कर’ला दिलेल्या खास मुलाखतीत अमिताभ बच्चन यांच्याशी संबंधित अनेक भावनिक आठवणी शेअर केल्या. त्यांनी सांगितले —
“मी ‘त्रिशूल’ हा चित्रपट ५० ते ६० वेळा पाहिला आहे. त्या चित्रपटात अमिताभ बच्चन यांनी साकारलेला विजय हा पात्र माझ्या मनात कायमचा कोरला गेला. त्यांच्या व्यक्तिरेखेतील जिद्द आणि आत्मविश्वास माझ्या आयुष्याचा प्रेरणास्त्रोत ठरला.”
ते पुढे म्हणाले, “त्या चित्रपटात बच्चन साहेबांनी आपल्या आईच्या नावाने मुंबईत ‘शांती कन्स्ट्रक्शन’ नावाची रिअल इस्टेट कंपनी सुरू केली होती. त्याचप्रमाणे माझेही स्वप्न होते की, अहमदाबादहून मुंबईत येऊन स्वतःची रिअल इस्टेट कंपनी सुरू करावी. काळाचा फेर आला, आणि मी खरोखरच मुंबईत आलो. तेव्हा फक्त बच्चन साहेबांना एकदा पाहावे, एवढेच स्वप्न होते — पण आज ते माझ्या चित्रपटांमध्ये काम करतात.”
पंडित यांनी पुढे सांगितले की, “अमिताभ बच्चन हे माझ्यासाठी फक्त अभिनेता नाहीत, ते एक ‘God Figure’ आहेत. त्यांच्या कडून मला शिस्त, समर्पण आणि व्यावसायिकता शिकायला मिळाली. ते सेटवर आल्यावर प्रत्येकाला प्रेरणा मिळते.”
अमिताभ बच्चन आणि आनंद पंडित यांचे हे विशेष नाते बॉलीवूडमधील आदर, विश्वास आणि आत्मीयतेचे उदाहरण ठरत आहे. त्यांच्या या सहकार्यामुळे प्रेक्षकांमध्येही उत्सुकता वाढली असून, ‘सरकार-४’ मध्ये बिग बी कशा नव्या भूमिकेत दिसणार याकडे सगळ्यांचे लक्ष लागले आहे.
