उत्तर भारतात पावसाने अक्षरशः हाहाकार माजवला आहे. पंजाब, दिल्ली, हिमाचल प्रदेश, उत्तराखंड आणि हरियाणा या राज्यांमध्ये मुसळधार पावसामुळे पूरस्थिती गंभीर बनली आहे. नद्यांना आलेल्या पुरामुळे अनेक खेडी, शहरे जलमय झाली असून, शेतीचे मोठे नुकसान झाले आहे. मान्सूनने यंदा गेल्या १४ वर्षांचा विक्रम मोडला असून, इतक्या तीव्रतेने पाऊस बरसलेला नव्हता.
दिल्लीतील यमुना नदी धोक्याच्या पातळीवरून वाहत असून, निचांकी भागांत पाणी शिरले आहे. हजारो नागरिकांना सुरक्षित स्थळी हलविण्यात आले आहे. शाळा बंद ठेवण्यात आल्या आहेत. दिल्ली-एनसीआरमध्ये वाहतूक विस्कळीत झाली आहे.
हिमाचल प्रदेशात परिस्थिती अधिकच बिकट झाली आहे. भूस्खलन, रस्ते कोसळणे, पुल वाहून जाणे अशा अनेक घटना घडल्या आहेत. शिमला, कुल्लू, मनाली या पर्यटनस्थळांवर अडकलेले पर्यटक सुरक्षित स्थळी हलविण्याचे प्रयत्न प्रशासन करत आहे. पंजाब आणि हरियाणामध्ये शेतजमिनी पाण्याखाली गेल्याने शेतकऱ्यांवर आर्थिक संकट कोसळले आहे.
तज्ज्ञांच्या मते, हवामान बदल आणि अनियमित पावसाचे चक्र यामुळे नैसर्गिक आपत्तींची तीव्रता वाढत आहे. केंद्र आणि राज्य सरकारे एकत्रितरीत्या बचावकार्याला लागली आहेत. एनडीआरएफ, एसडीआरएफ आणि लष्कराच्या टीम्स मदतकार्य करीत आहेत.
नद्या रौद्ररूप धारण करून मानवी वस्त्यांमध्ये शिरल्याने हजारो लोक बेघर झाले आहेत. अनेक गावे जगापासून तुटली आहेत. पूरग्रस्तांना तातडीने मदत पोहोचविण्यासाठी प्रशासनाने युद्धपातळीवर प्रयत्न सुरू केले आहेत.
