खोपोली :- आपत्तीजनक प्रसंग कुठेही, केव्हाही ओढवू शकतो आणि अशा प्रसंगी सर्वप्रथम मदतीचा हात पुढे करणारी संस्था म्हणजे हेल्प फाउंडेशन. विविध दुर्घटना, पुरस्थिती, रस्ते अपघात किंवा नैसर्गिक आपत्ती असो, हेल्प फाउंडेशनची टीम तात्काळ घटनास्थळी पोहोचून जीव वाचवण्यासाठी आणि मदतकार्य राबवण्यासाठी ओळखली जाते. या संस्थेच्या धडाडीला आणि कार्यशैलीला दाद देत जे एस डब्ल्यू खोपोली कंपनीने मदतीचा हात पुढे करत वॉटर रेस्क्यूसाठी अत्यावश्यक साहित्य सुपूर्द केले.
मदतकार्याचे नवे पर्व सुरू जे एस डब्ल्यू कंपनीचे प्लांट हेड राहुल महाकाल यांच्या हस्ते हे साहित्य हेल्प फाउंडेशनच्या प्रतिनिधींना देण्यात आले. या वेळी एच. आर. जनरल मॅनेजर अनिल महाजन, डेप्युटी मॅनेजर अतुल शिंदे, सिनियर इंजिनिअर प्रवीण तावडे आदी मान्यवर उपस्थित होते. हेल्प फाउंडेशनचे गुरुनाथ साठेलकर, विजय भोसले, अमोल कदम आणि हनीफ कर्जीकर यांनी संस्थेच्या कार्यप्रणालीची माहिती देत समाजहितासाठी संस्थेने उचललेली पावले मांडली.
प्रशंसा आणि भविष्यातील आश्वासन हेल्प फाउंडेशनच्या टीमची कार्यशैली पाहून उपस्थित मान्यवरांनी त्यांचे उत्स्फूर्त कौतुक केले आणि शाबासकीची थाप दिली. तसेच भविष्यात आपत्ती व्यवस्थापनासाठी आवश्यक असलेली आणखी अत्याधुनिक साधनसामग्री व संसाधने उपलब्ध करून देण्याचा संकल्प कंपनीतर्फे व्यक्त करण्यात आला.
समाजासाठी आधारस्तंभ हेल्प फाउंडेशनने मागील अनेक वर्षांत पुरग्रस्त भागात रेस्क्यू ऑपरेशन्स, अपघातातील पीडितांना मदत, तसेच गरजूंसाठी आरोग्य आणि रक्तदान शिबिरे आयोजित करून सामाजिक कार्यात सातत्य ठेवले आहे. त्यामुळे या मदतीमुळे संस्थेच्या कार्यक्षमतेत आणखी वाढ होणार आहे.
