पुणे : पुण्यातील गणेशोत्सव हा परंपरा, श्रद्धा आणि उत्साहाचा मिलाफ मानला जातो. यंदा बुधवारी (दि. २७ ऑगस्ट २०२५) पासून गणेशोत्सवाची सुरुवात होत आहे. प्रतिष्ठापना, मूर्ती खरेदी आणि मिरवणुकांमुळे शहरात लाखोंच्या संख्येने गणेशभक्तांची गर्दी अपेक्षित असल्याने वाहतूक विभागाने कडेकोट नियोजन केले आहे. २५ ते २७ ऑगस्ट दरम्यान काही प्रमुख मार्गांवर वाहतुकीत बदल करण्यात येणार आहेत.
डेंगळे पूल, पेठांचा भाग, सिंहगड रस्ता, केशवनगर आणि मुंढवा परिसरातील काही रस्त्यांवर तात्पुरते वाहतूक निर्बंध लागू राहतील. वाहतुकीची कोंडी टाळण्यासाठी पर्यायी मार्ग आणि स्वतंत्र पार्किंगची सुविधा देण्यात आली आहे. पोलिसांनी नागरिकांना आवाहन केले आहे की, गर्दीच्या भागात वाहन घेऊन जाण्याऐवजी पर्यायी रस्त्यांचा वापर करावा आणि पोलिसांच्या सूचनांचे पालन करावे.
वाहतूक बदल आणि बंद रस्ते
शिवाजी रोडवर गाडगीळ पुतळा चौक ते गोतीराम भैय्या चौक वाहतुकीसाठी बंद
फडके हौद चौक ते जिजामाता चौक, फुटका बुरूज, आप्पा बळवंत चौक ते बुधवार चौक आणि मोती चौक मार्गे वाहनांना बंदी.
मंगला टॉकीजसमोरील रस्त्यावर जड वाहनांना प्रवेश बंदी.
पीएमपी बससाठी पर्यायी मार्ग
शिवाजीनगर बसस्थानक → स.गो. बर्वे चौक → जंगली महाराज रस्ता → टिळक रस्ता → स्वारगेट.
मनपा बसस्थानक → जंगली महाराज रस्ता → अलका टॉकीज चौक → टिळक रस्ता → शास्त्री रस्ता → स्वारगेट.
पार्किंगची विशेष सोय
गणेशभक्त आणि मूर्ती खरेदीसाठी आलेल्या नागरिकांना खालील ठिकाणी वाहने पार्क करता येतील :
कामगार पुतळा चौक ते शिवाजी पुतळा
संताजी घोरपडे पथ ते गाडगीळ पुतळा
टिळक पूल ते भिडे पूल दरम्यान नदीपात्रातील रस्ता
मंडई येथील मिनव्हा, आयर्न पार्किंग तळ
शाहू चौक ते राष्ट्रभूषण चौक
पोलिसांचे आवाहन
गणेशोत्सव हा पुण्याचा मानाचा सोहळा असून, यामध्ये सर्व नागरिकांनी शिस्त राखावी, वाहतूक नियम पाळावेत आणि पर्यायी मार्गांचा योग्य वापर करावा, असे आवाहन वाहतूक पोलिसांनी केले आहे.
“पुणे गणेशोत्सव २०२५ : वाहतुकीत मोठे बदल, बंद रस्ते व पर्यायी मार्ग जाहीर – पोलिसांचा वाहतुकीसाठी विशेष आराखडा”
