महाराष्ट्रात पत्रकारितेच्या स्वातंत्र्यावर सतत प्रश्नचिन्ह निर्माण करणाऱ्या घटनांमध्ये आणखी एक संतापजनक प्रकार कर्जत तालुक्यात घडला आहे. संवाद मराठी चँनलचे पत्रकार बाबू पोटे यांच्यावर खालापूर तालुक्यातील संकेत भासे यांनी पोलिसांत तक्रार दाखल केली असून, पत्रकारावर दबाव टाकण्याचा हा प्रयत्न आहे, असा आरोप अखिल भारतीय मराठी पत्रकार परिषदेचे मुख्य विश्वस्त एस. एम. देशमुख यांनी केला आहे.
पत्रकार पोटे यांनी २ जुलै २०२५ रोजी के.डी.एल. बायोटेक या बंद कंपनीसमोर कामगारांनी केलेल्या निदर्शनाची बातमी व कामगार नेत्यांची भाषणे त्यांच्या चॅनलवर थेट दाखवली होती. ही घटना नोंदवणे हे पत्रकारितेचा एक भाग असतानाही, संकेत भासे यांनी यामधून आपली बदनामी झाल्याचे कारण देत पोटे यांच्यावर तक्रार दाखल केली. यानंतर पोलिसांनी पोटे यांना नोटीस पाठवून खुलासा मागवला आहे.
एस. एम. देशमुख म्हणाले की, “हे प्रकरण केवळ एका पत्रकारावरचा हल्ला नसून, पत्रकारितेच्या मुल्यांवरच होणारा आघात आहे. एखाद्या घटनेचं थेट वृत्तांकन करणं हे पत्रकाराचं कर्तव्य आहे. त्यासाठी पोलिसांची नोटीस पाठवणं म्हणजे पत्रकारांचा आवाज दाबण्याचा प्रयत्न आहे.”
यासंदर्भात रायगड प्रेस क्लब, डिजिटल मिडिया परिषद, पत्रकार हल्ला विरोधी कृती समिती आणि अखिल भारतीय मराठी पत्रकार परिषद यांनीही जोरदार निषेध व्यक्त केला आहे. या संस्थांनी स्पष्टपणे सांगितले की, जर असे प्रकार थांबवले गेले नाहीत, तर पत्रकार एकवटून आंदोलन करतील.
पत्रकार बाबू पोटे यांनी कुठल्याही पक्षपातीपणाविना सत्य समोर मांडले. जर समाजातील दुर्लक्षित घटकांचे प्रश्न मांडणाऱ्यांना पोलिसांमार्फत दबावाखाली आणले जात असेल, तर ही लोकशाहीसाठी धोक्याची घंटा आहे, असा गंभीर इशारा पत्रकार परिषदेने दिला आहे.
निष्कर्ष: पत्रकारांची सुरक्षितता, अभिव्यक्ती स्वातंत्र्य व लोकशाही मूल्ये जपण्यासाठी अशा प्रकारांचा निषेध करणे अत्यावश्यक आहे. पत्रकारिता ही गुन्हा नसून, समाजाचे आरसे आहे. त्यामुळे या प्रकाराची सखोल चौकशी करून दोषींवर कारवाई करावी, अशी मागणी पत्रकार संघटनांकडून करण्यात येत आहे.
