तळेगाव दाभाडे शहरात आज ७९ वा स्वातंत्र्य दिन अत्यंत दिमाखात आणि उत्साहात साजरा करण्यात आला. शहरातील विद्याविहार कॉलनीत भव्य ध्वजारोहण सोहळा पार पडला. या वेळी सुभेदार श्री. विष्णूजी पठाडे यांच्या हस्ते राष्ट्रीय ध्वज फडकावण्यात आला. देशभक्तीपर गीतांचा गजर, “भारत माता की जय” आणि “वंदे मातरम”च्या घोषणांनी परिसर दुमदुमून गेला. नागरिक, महिला, युवा आणि बालकांनी मोठ्या उत्साहात या ऐतिहासिक क्षणाचा आनंद साजरा केला.
स्वातंत्र्य दिनाच्या औचित्याने आमदार सुनील शेळके यांच्या हस्ते सभागृह व ओपन स्पेस विकासकामांचा लोकार्पण सोहळा संपन्न झाला. या प्रकल्पासाठी तब्बल ₹१ कोटी १५ लाख ८० हजारांचा निधी मंजूर करून खर्च करण्यात आला असून, या विकासकामांमुळे परिसरातील नागरिकांना आधुनिक, सुरक्षित आणि आकर्षक सुविधा उपलब्ध होणार आहेत.
या प्रकल्पांतर्गत पूर्ण झालेली कामे :
ओपन स्पेसचे सुशोभीकरण व विकास
आधुनिक सभागृहाचे बांधकाम
ओपन स्पेसला चेनलिंक कंपाउंड बसविणे
पादचारी मार्गाची उभारणी
डेकोरेटिव्ह लाइट पोलची बसवणूक
नागरिकांसाठी ओपन जिम साहित्याची स्थापना
मुलांसाठी नवीन खेळणी बसविणे व जुनी खेळणी दुरुस्त करणे
या सुविधांमुळे नागरिकांना व्यायामासाठी योग्य साधनसामग्री, मुलांना सुरक्षित खेळण्याची जागा आणि समाजातील सांस्कृतिक उपक्रमांसाठी एक सुंदर सभागृह उपलब्ध होणार आहे. परिसरातील सामाजिक, सांस्कृतिक आणि आरोग्यदायी वातावरण अधिक बहरणार असल्याची भावना व्यक्त करण्यात आली.
या लोकार्पण सोहळ्यास श्री. गणेशभाऊ खांडगे, श्री. कृष्णाजी कारके, श्री. सुरेश धोत्रे, श्री. विजयकुमार सरनाईक, श्री. गणेश काकडे, श्री. बजरंग जाधव, सौ. शैलजाताई काळोखे, श्री. सुदर्शनजी खांडगे, श्री. रामभाऊ गवारे, श्री. सुरेशभाऊ गायकवाड, श्री. सुहास गरुड, श्री. संजय चव्हाण, श्री. चंद्रकांत दाभाडे यांसारखे मान्यवर उपस्थित होते.
कार्यक्रमात बोलताना मान्यवरांनी म्हटले की, “नागरिकांच्या सक्रिय सहभागामुळे आणि स्थानिक नेतृत्वाच्या प्रयत्नांमुळेच अशा दर्जेदार आणि उपयुक्त विकासकामांची अंमलबजावणी शक्य झाली आहे. परिसराच्या सर्वांगीण विकासासाठी ही कामे मैलाचा दगड ठरतील.”
ध्वजारोहण आणि लोकार्पण सोहळ्याच्या यशस्वी आयोजनामुळे परिसरात उत्साहाचे आणि देशभक्तीचे वातावरण निर्माण झाले. नागरिकांनी एकमेकांना स्वातंत्र्य दिनाच्या शुभेच्छा देत कार्यक्रमाची सांगता केली.
