देहूरोड | प्रतिनिधी — देहूरोड पोलीस ठाण्याच्या हद्दीत जंगल परिसरात घडलेली एक खळबळजनक घटना समोर आली आहे. प्रेमप्रकरणातून सुड घेण्यासाठी सनी सिंग या तरुणाने दिलीप मोर्चा (वय १६) या अल्पवयीन मुलाचा खून केल्याचा संशय आहे. दिलीपच्या मृतदेहावर वाराचे गंभीर जखमी निशाण असून, त्याचा चुलत भाऊ अरुण मोर्चा देखील जखमी झाल्याची माहिती मिळाली आहे.
ही घटना देहूरोड येथील थॉमस कॉलनी लगतच्या जंगल परिसरात घडली. बुधवार (दि. ११) रात्री दिलीप आणि अरुण यांच्यावर अचानक हल्ला करण्यात आला. पोलीस सूत्रांनुसार, दिलीप याचा मृत्यू जागीच झाला, तर अरुणला गंभीर अवस्थेत रुग्णालयात दाखल करण्यात आले आहे. या घटनेमुळे देहूरोड परिसरात भीतीचं वातावरण निर्माण झालं आहे.
प्राथमिक तपासात समोर आलं आहे की, मृत दिलीप आणि आरोपी सनी सिंग यांच्या बहिणीमध्ये प्रेमसंबंध होते. या संबंधामुळेच दोन्ही कुटुंबांमध्ये मतभेद होते. याचाच राग मनात ठेवून सनीने ही अतिशय धक्कादायक कृती केली असावी, असा पोलिसांना संशय आहे.
सध्या देहूरोड पोलिसांनी आरोपी सनी सिंग (रा. देहूरोड, मुळ रा. गंगीरामपुर, बिहार) याच्यावर गुन्हा दाखल केला आहे. वरिष्ठ पोलीस निरीक्षक विक्रम बनसोडे यांच्या मार्गदर्शनाखाली अधिक तपास सुरू आहे. पोलिसांनी घटनास्थळी फॉरेन्सिक टीमला बोलावले असून, पुरावे गोळा करण्याचे काम सुरू आहे.
या घटनेने संपूर्ण देहूरोड परिसरात खळबळ माजली आहे. नागरिकांनी पोलिसांनी तात्काळ कारवाई करून दोषींवर कठोर शिक्षा करण्याची मागणी केली आहे.
प्रेमाचा सुड की पूर्वनियोजित कट? देहूरोडमध्ये अल्पवयीन मुलाचा निर्घृण खून, संशयित सनी सिंगवर गुन्हा दाखल
🔸 आरोपी अद्याप फरार, पोलिसांचा शोधमोहीमेला वेग 🔸 मृत मुलाचा चुलत भाऊ गंभीर जखमी 🔸 पोलिसांकडून सखोल तपास सुरू 🔸 देहूरोड परिसरात भीतीचं वातावरण
