पुणे : शहरात खंडणीसाठी दहशत माजवणाऱ्यांच्या मुसक्या आवळण्यात पुणे पोलिसांना मोठे यश मिळाले आहे. बांधकाम व्यावसायिकाला अरुण गवळी टोळीच्या नावाने तब्बल पाच कोटी रुपयांची खंडणी मागणाऱ्या चार जणांना विमाननगर येथील एका हॉटेलमध्ये सापळा रचून गजाआड करण्यात आले. ही कारवाई लष्कर पोलीस ठाणे, खंडणीविरोधी पथक व गुन्हे शाखेच्या युनिट ४ च्या संयुक्त पथकाने केली.
अटक करण्यात आलेल्यांची नावे रोहन गवारे (३०, रा. शीतल अपार्टमेंट, कवडेवाडी, कोरेगाव पार्क), सुदर्शन गायके (२७, रा. महादेव मंदिरासमोर, वाळुंज, संभाजीनगर), महेंद्र शेळके (४२, रा. शाहूनाथनगर, जि. बीड) आणि कृष्णा बुधनर (२६, रा. हनुमान मंदिराजवळ, खामगाव, जि. बीड) अशी आहेत.
वादातून कट कारस्थान: तक्रारदार बांधकाम व्यावसायिक हे गेल्या १२ वर्षांपासून या क्षेत्रात कार्यरत आहेत. त्यांचा एका व्यावसायिक भागीदारासोबत हॉटेल व्यवसायावरून वाद सुरू होता. हे प्रकरण सध्या न्यायालयात प्रलंबित आहे. त्या भागीदाराने व्यवसायासाठी आठ कोटी रुपये दिल्याचा दावा केला होता, आणि बांधकाम व्यावसायिकाने ती रक्कम वैयक्तिक कारणांसाठी वापरल्याचा आरोप केला होता. याच वादातून, भागीदाराने आरोपींशी संगनमत करून खंडणी उकळण्याचा कट रचला.
अरुण गवळीच्या नावाने धमकी: आरोपींनी बांधकाम व्यावसायिकाचा मोबाईल क्रमांक मिळवून त्याला अज्ञात क्रमांकावरून फोन केला. स्वतःला “गुंड अरुण गवळीचा स्वीय सहायक” असल्याचे सांगत आरोपींनी सुरुवातीला सात कोटी रुपयांची खंडणी मागितली. त्यानंतर “तडजोडीत” पाच कोटी रुपये रोख देण्याची धमकी दिली. त्यासाठी विमाननगर भागातील एका हॉटेलमध्ये येण्यास सांगितले.
पोलिसांची सापळा रचना: खंडणीविरोधी पथकाने बांधकाम व्यावसायिकासोबत हॉटेलच्या परिसरात हुशारीने सापळा लावला. आरोपी खंडणी घेण्यासाठी आले असता त्यांना तत्काळ ताब्यात घेण्यात आले. या कारवाईत गुन्हे शाखेचे उपायुक्त निखिल पिंगळे, परिमंडळ दोनचे उपायुक्त मिलिंद मोहिते, सहाय्यक आयुक्त राजेंद्र मुळीक व संगीता अल्फान्सो यांच्या मार्गदर्शनाखाली लष्कर पोलीस ठाण्याचे वरिष्ठ निरीक्षक गिरीशकुमार दिघावकर, पोलिस निरीक्षक शैलेश संखे आणि अजय वाघमारे यांच्या पथकाने ही मोहीम पार पाडली.
या घटनेमुळे बांधकाम क्षेत्रातील व्यावसायिकांमध्ये दिलासा पसरला असून, पोलिसांच्या जलद कारवाईचे सर्वत्र कौतुक होत आहे.
