पुणे | २८ जुलै २०२५ | पुण्यातील खराडी परिसरातील ‘स्टेबर्ड अझुर सूट’ हॉटेलमध्ये शनिवारी रात्री पोलिसांनी टाकलेल्या रेव्ह पार्टीवर छाप्यातून उडालेल्या खळबळीने राजकीय वर्तुळात मोठे वादंग निर्माण झाले आहे. यामध्ये राष्ट्रवादी काँग्रेसच्या शरद पवार गटातील नेत्या रोहिणी खडसे यांचे पती आणि माजी मंत्री एकनाथ खडसे यांचे जावई प्रांजल खेवलकर आढळून आल्याने या प्रकरणाला वेगळेच राजकीय वळण लागले आहे.
आता नवीन ट्विस्ट! – बनावट केस? पूर्वनियोजित ट्रॅप?
या प्रकरणात आता प्रांजल खेवलकर यांचे वकील अ‍ॅड. विजयसिंह ठोंबरे आणि एथिकल हॅकर मनीष भंगाळे यांनी एकामागोमाग एक धक्कादायक दावे करून सर्वांचं लक्ष वेधलं आहे.
अ‍ॅड. ठोंबरे म्हणाले, “ही रेव्ह पार्टी नव्हतीच, फक्त एका फ्लॅटमध्ये काहीजण एकत्र आले होते. खेवलकर यांनी कोणताही अमली पदार्थ सेवन केलेला नाही, हे रक्त तपासणीतून स्पष्ट होईल.”
एथिकल हॅकरचा दावा: “खेवलकर यांचा काहीही संबंध नाही!”
एथिकल हॅकर मनीष भंगाळे यांनी तर अजूनच गंभीर दावा करत सांगितलं की, “प्रांजल खेवलकर यांना कॉल करून मुद्दामहून तिथे बोलावण्यात आलं आणि लगेचच पोलिसांनी छापा टाकला. हे पूर्ण प्रकरण पूर्वनियोजित आहे. त्यांच्या कॉल डिटेल्स, लोकेशन डेटा, आणि डिजिटल पुरावे तपासले तर हा संपूर्ण कट उघड होईल.”
त्यांनी असंही म्हटलं की, “खेवलकर यांना पार्टीतील कुणीही व्यक्ती ओळखीची नव्हती. त्यांचा या सर्वांशी पूर्वी काहीही संबंध नव्हता. हा स्पष्टपणे राजकीय हेतूने रचलेला जाळा आहे.”
पोलिसांच्या तपासाची वाट
या आरोपांनंतर पुणे पोलिसांवर आता अधिक सखोल तपास करण्याची गरज निर्माण झाली आहे. मनीष भंगाळे यांनी स्पष्ट केलं आहे की, “मी लवकरच पुणे पोलिसांना सर्व तांत्रिक माहिती पुरवणार आहे. कॉल रेकॉर्ड्स, लोकेशन हिस्टरी, डिजिटल संवाद यावरून सत्य समोर येईल.”
राजकीय प्रतिक्रिया आणि खळबळ
या प्रकरणानंतर खडसे कुटुंब आणि राष्ट्रवादी शरद पवार गटात प्रचंड अस्वस्थता आहे. खेवलकर यांचं नाव पुढे आल्यानंतर राजकीय वर्तुळात त्यांना टार्गेट केलं जात असल्याचा आरोप देखील काही समर्थकांकडून केला जात आहे.
निष्कर्ष
या प्रकरणात अमली पदार्थ सापडले असले तरी ते कोणाच्या मालकीचे होते, कोण त्या फ्लॅटचा आयोजक होता, खेवलकर तिथे कसे पोहोचले – हे सारे तपासाचे मुद्दे आता ठळकपणे समोर आले आहेत.
