मुंबई : मुख्यमंत्री देवेंद्र फडणवीस यांच्या प्रमुख उपस्थितीत माहिती तंत्रज्ञान विभाग, महाराष्ट्र शासन आणि ‘समग्र’ या संस्थेमध्ये महत्त्वपूर्ण सामंजस्य करार झाला. या करारामुळे महाराष्ट्रात ई-गव्हर्नन्स सुधारणा अधिक वेगाने राबवल्या जातील आणि नागरिकांना पारदर्शक, जलद व सोयीच्या डिजिटल सेवा मिळतील.
या समारंभाला मंत्री ॲड. आशिष शेलार, ‘समग्र’ संस्थेचे संस्थापक व मुख्य कार्यकारी अधिकारी गौरव गोयल, तसेच शासनाचे वरिष्ठ अधिकारी व तंत्रज्ञान क्षेत्रातील मान्यवर उपस्थित होते.
मुख्यमंत्री फडणवीस यांनी या कराराचे स्वागत करत सांगितले की, “ई-गव्हर्नन्स हे केवळ तंत्रज्ञानाचे नव्हे, तर जनतेशी जोडणाऱ्या व्यवस्थेचे नाव आहे. या करारामुळे महाराष्ट्रात डिजिटल प्रशासन आणखी सक्षम होईल आणि नागरी सेवांमध्ये मोठा बदल घडेल.”
‘समग्र’ ही संस्था शासनाच्या विविध यंत्रणांमध्ये डिजिटल इंटरफेस, डेटा अॅनालिटिक्स, कृत्रिम बुद्धिमत्ता (AI), आणि ब्लॉकचेन अशा तंत्रज्ञानांचा वापर करून प्रशासन अधिक सक्षम व पारदर्शक करण्यासाठी कार्यरत आहे.
मंत्री ॲड. आशिष शेलार यांनी सांगितले, “नवीन युगातील सुशासनासाठी तंत्रज्ञानाचा प्रभावी वापर आवश्यक आहे. महाराष्ट्र सरकार आणि ‘समग्र’ यांची ही भागीदारी म्हणजे प्रशासनातील क्रांतीची नांदी आहे.”
या करारामुळे नागरी सेवा वितरणात गती, अचूकता व पारदर्शकता येईल, तसेच नागरिकांच्या तक्रारींवर वेळीच उपाययोजना होणे शक्य होईल.
🔹 ई-गव्हर्नन्स क्षेत्रात ऐतिहासिक पाऊल 🔹 महाराष्ट्र सरकार आणि ‘समग्र’ यांच्यात सामंजस्य करार 🔹 डिजिटल महाराष्ट्राच्या दिशेने ठोस पावले
