पिंपरी-चिंचवडकरांनो खबरदारी घ्या! गुरुवारी (12 जून) संध्याकाळचा पाणीपुरवठा बंद – दुसऱ्या दिवशी कमी दाबाने होणार पुरवठा; मनपाची विनंती: पाणी साठवून ठेवा!

पिंपरी – पिंपरी-चिंचवड महापालिकेच्या पाणीपुरवठा विभागाकडून अत्यावश्यक देखभाल-दुरुस्तीची कामे हाती घेण्यात येणार आहेत. या कामांमुळे गुरुवार, दिनांक १२ जून २०२५ रोजी संध्याकाळचा संपूर्ण शहरातील पाणीपुरवठा बंद ठेवण्यात येणार आहे. तसेच शुक्रवार, १३ जून रोजी सकाळचा पाणीपुरवठा कमी दाबाने व अनियमित असेल, अशी माहिती पाणीपुरवठा विभागाकडून देण्यात आली आहे.

 कोणत्या कारणामुळे होतोय पाणीपुरवठा बंद?

महानगरपालिकेच्या से. क्र. २३ येथील स्थापत्य व विद्युत विषयक देखभाल तसेच निगडी जलशुद्धीकरण केंद्रामधील दुरुस्ती आणि क्षेत्रीय वितरण प्रणालीतील आवश्यक तांत्रिक कामे या दिवशी होणार आहेत. यासाठी संपूर्ण प्रणाली काही तासांसाठी थांबवणे अपरिहार्य असल्याचे अधिकार्‍यांनी स्पष्ट केले आहे.

 कोणत्या भागांवर परिणाम?

हा बंद संपूर्ण पिंपरी-चिंचवड शहराला लागू आहे. त्यात पिंपरी, चिंचवड, निगडी, भोसरी, आकुर्डी, थेरगाव, वाकड, रावेत, सांगवी, पिंपळे सौदागर, मोशी, चिखली, रावेत आदी भागांचा समावेश आहे.

नागरिकांसाठी महत्त्वाची सूचना!

महानगरपालिकेने नागरिकांना विनंती केली आहे की,

बुधवारी (११ जून) सायंकाळपर्यंत पुरेसा पाणीसाठा करून ठेवावा.

पाण्याचा अत्यावश्यक वापर व काटकसर करावी.

शुक्रवारी सकाळच्या वेळी कमी दाबाने पाणी येणार असल्यामुळे धीराने व संयमाने सहकार्य करावे.

 शाश्वत पाणी व्यवस्थेसाठी पालिकेचा प्रयत्न

या देखभाल कामांमुळे पाणीपुरवठा यंत्रणेतील कार्यक्षमता वाढणार असून, आगामी काळात नागरिकांना अधिक सुरळीत आणि स्थिर पाणीपुरवठा मिळावा, हा उद्देश असल्याचे पाणीपुरवठा विभागाकडून सांगण्यात आले.

 महापालिकेची विनंती

“सदर देखभाल कामे शहराच्या भविष्यातील पाणीपुरवठा सुरळीत राहावा यासाठी अत्यावश्यक आहेत. नागरिकांनी प्रशासनाशी सहकार्य करून, पाण्याचा जबाबदारीने वापर करावा,” असे आवाहन पिंपरी-चिंचवड महानगरपालिका प्रशासनाने केले आहे.