दोन महिने उलटूनही लेक्चर्स-प्रॅक्टि कल्स ठप्प! SITS नऱ्हेच्या विद्यार्थ्यांचा DTE वर धडक मोर्चा; आश्वासन न पाळल्यास बेमुदत आंदोलनाचा इशारा.

दोन महिने उलटूनही लेक्चर्स-प्रॅक्टि कल्स ठप्प! SITS नऱ्हेच्या विद्यार्थ्यांचा DTE वर धडक मोर्चा; आश्वासन न पाळल्यास बेमुदत आंदोलनाचा इशारा.

पोटाला चिमटा काढून लाखोंची फी भरली, पण शिक्षणच बंद; विद्यार्थ्यांचे दुसऱ्या महाविद्यालयात स्थलांतर आणि फी-हॉस्टेल शुल्क परत करण्याची पालकांची मागणी.

पुणे : सिंहगड इन्स्टिट्यूट ऑफ टेक्नॉलॉजी अँड सायन्स (SITS), नऱ्हे कॅम्पसमधील शैक्षणिक कामकाज गेल्या दोन महिन्यांपासून ठप्प असल्याच्या निषेधार्थ पालक आणि विद्यार्थ्यांनी महाराष्ट्र राज्य तंत्रशिक्षण विभागीय कार्यालयावर (DTE) धडक मोर्चा काढला. लेक्चर्स आणि प्रॅक्टिकल्स सुरू नसल्याने विद्यार्थ्यांचे शैक्षणिक नुकसान होत असून, प्रवेश घेतलेल्या विद्यार्थ्यांना अन्य सक्षम महाविद्यालयांमध्ये स्थलांतरित करावे, अशी मागणी ‘SITS नऱ्हे पालक संघर्ष समिती’ने केली.

शेतकरी, कष्टकरी आणि नोकरदार पालकांनी कर्ज काढून, प्रसंगी जमिनी विकून मुलांच्या शिक्षणासाठी लाखो रुपयांची फी भरली आहे. मात्र, दोन महिने उलटूनही नियमित शिक्षण सुरू नसल्याने पालक आर्थिक आणि मानसिक अडचणीत सापडले आहेत. संस्थेचे अधिकृत हॉस्टेल बंद असल्याने विद्यार्थ्यांना बाहेर खासगी हॉस्टेल, खोल्या आणि मेससाठी अतिरिक्त खर्च करावा लागत असल्याचेही पालकांनी सांगितले.

यापूर्वी २८ सप्टेंबर रोजी संस्थेचे संस्थापक मारुती नवले यांना निवेदन देण्यात आले होते. त्यानंतर २२ ऑक्टोबर रोजी पुन्हा भेट घेऊन समस्या मांडण्यात आल्या. मात्र, काही दिवसांत परिस्थिती सुरळीत होईल, अशी आश्वासने देऊनही प्रत्यक्षात कोणतीही सुधारणा झाली नाही. पालक समितीने सावित्रीबाई फुले पुणे विद्यापीठाचे प्र-कुलगुरू डॉ. पराग काळकर यांची भेट घेतल्यानंतर विद्यापीठाने २४ तासांत संस्थेला कारणे दाखवा नोटीस बजावली. उच्च व तंत्रशिक्षण मंत्री  यांची भेट घेण्याचा प्रयत्न करूनही भेट मिळत नसल्याबद्दल पालकांनी नाराजी व्यक्त केली.

‘पालकांनी रक्ताचे पाणी करून मुलांच्या शिक्षणासाठी पैसा उभा केला. मात्र, लाखो रुपये खर्च करूनही विद्यार्थ्यांना दोन महिन्यांपासून शिक्षण मिळत नाही. या परिस्थितीमुळे एखाद्या पालकाने किंवा विद्यार्थ्याने टोकाचे पाऊल उचलल्यास त्याची जबाबदारी सरकार, उच्च शिक्षण विभाग आणि सीईटी सेलने घ्यावी,’ असा संतप्त इशारा समितीचे प्रतिनिधी प्रशांत कांबळे यांनी दिला.

आंदोलनानंतर पालक संघर्ष समितीने तंत्रशिक्षण विभागीय सहसंचालक डॉ. सुरेश आ. पाटील यांना मागण्यांचे निवेदन सादर केले. त्यामध्ये SITS नऱ्हे कॅम्पसमधील सर्व विद्यार्थ्यांचे प्रवेश रद्द करून त्यांना सक्षम शासकीय किंवा मान्यताप्राप्त महाविद्यालयांमध्ये स्थलांतरित करावे, स्थलांतरापूर्वी पालकांशी प्रत्यक्ष चर्चा करून घराजवळील व सोयीचे महाविद्यालय निवडण्याची संधी द्यावी, तसेच स्थलांतराची प्रक्रिया पूर्ण होईपर्यंत नियमित ऑफलाइन लेक्चर्स आणि प्रॅक्टिकल्स पूर्ण क्षमतेने सुरू ठेवावेत, अशा मागण्या करण्यात आल्या. याशिवाय विद्यार्थ्यांकडून घेतलेली शैक्षणिक व हॉस्टेल फी व्याजासह परत करण्याची मागणीही करण्यात आली.

निवेदन स्वीकारताना सहसंचालक स्मिता गाडे यांनी विद्यार्थ्यांचे शैक्षणिक नुकसान होऊ दिले जाणार नाही आणि मागण्यांबाबत तातडीने आवश्यक शासकीय पावले उचलली जातील, असे लेखी आश्वासन दिले. मात्र, हे आश्वासन निर्धारित वेळेत पूर्ण न झाल्यास मंत्रालयासमोर आणि तंत्रशिक्षण विभागीय कार्यालयासमोर बेमुदत धरणे आंदोलन करण्यात येईल, असा इशारा समितीने दिला.

या आंदोलनात नामदेव तौर, राजेंद्र बल्लाळ, किशोर मोहिते, सुनील बोरगे, रमेश गायकवाड, अंजली ठोंबरे, रेणुका यादव, संजय गाडेकर, वैभव जावहिरे, शिवाजी ठोबरे, संपतराव घोरपडे, नारायण खळकर, संतोष पवार, शंकरराव होणराव, राजेंद्र काळे यांच्यासह अनेक पालक आणि तनया कांबळे, कृपा जावहिरे, अदिती गायकवाड, तन्मयी बल्लाळ, तेजस्विनी बोरघे, अवधूत यादव, संस्कार खालडकर, विनायक मोहिते, अथर्व बोडके, सक्षम गायकवाड आणि शिवम होनराव यांच्यासह विद्यार्थी मोठ्या संख्येने सहभागी झाले होते.