पिंपरी, दि. २६ फेब्रुवारी २०२६ : सामाजिक समता, शिक्षणाचा प्रसार आणि संविधानिक मूल्यांची जपणूक यासाठी क्रांतिसूर्य महात्मा जोतीराव फुले आणि डॉ. बाबासाहेब आंबेडकर यांच्या विचारांचे आजच्या पिढीपर्यंत प्रभावीपणे संवर्धन व्हावे, या उद्देशाने पिंपरी-चिंचवड महानगरपालिकेच्या वतीने आयोजित करण्यात येणाऱ्या ‘विचार प्रबोधन पर्वा’च्या नियोजनासाठी शहरातील सामाजिक संघटनांची महत्त्वपूर्ण बैठक पार पडली. महापौर रवि लांडगे यांच्या अध्यक्षतेखाली मुख्यालयातील मधुकर पवळे सभागृहात ही बैठक आयोजित करण्यात आली होती.
या वेळी बोलताना महापौर रवि लांडगे यांनी सांगितले की, फुले-आंबेडकर विचार हे केवळ ऐतिहासिक संदर्भापुरते मर्यादित नसून ते आधुनिक समाजरचनेचे दिशादर्शक तत्त्व आहेत. युवकांमध्ये वैज्ञानिक दृष्टिकोन, सामाजिक सलोखा, स्त्री-पुरुष समानता आणि लोकशाही मूल्यांची रुजवणूक करण्यासाठी विचार प्रबोधन पर्व प्रभावी व्यासपीठ ठरावे, यासाठी विविध उपक्रम राबविण्याचा मानस आहे. व्याख्याने, परिसंवाद, ग्रंथप्रदर्शने, माहितीपट, नाट्यप्रयोग तसेच शालेय व महाविद्यालयीन विद्यार्थ्यांसाठी निबंध, वक्तृत्व आणि चित्रकला स्पर्धा आयोजित करण्याचा प्रस्ताव यावेळी मांडण्यात आला.
बैठकीस उपमहापौर शर्मिला बाबर, सभागृह नेते प्रशांत शितोळे, विरोधी पक्षनेते भाऊसाहेब भोईर, नगरसदस्य धर्मपाल तंतरपाळे, डॉ. सुहास कांबळे, सारिका मासुळकर यांच्यासह अनेक मान्यवर उपस्थित होते. विविध सामाजिक संघटनांचे पदाधिकारी, कार्यकर्ते आणि अभ्यासकांनी कार्यक्रम अधिक लोकाभिमुख व प्रभावी करण्यासाठी सूचना मांडल्या. स्थानिक वक्ते, संशोधक आणि सामाजिक कार्यकर्त्यांना व्यासपीठ उपलब्ध करून देण्यावर भर देण्यात आला.
विचार प्रबोधन पर्व हे केवळ औपचारिक कार्यक्रम न राहता जनचळवळ बनावी, यासाठी संयुक्त नियोजन समिती स्थापन करण्याचा निर्णय बैठकीत घेण्यात आला. तसेच कार्यक्रमांचे वेळापत्रक वेळेत जाहीर करून प्रसिद्धी-प्रसारासाठी सोशल मीडिया, डिजिटल प्लॅटफॉर्म आणि शाळा-महाविद्यालयांमार्फत व्यापक जनजागृती करण्याचेही ठरले. महिलांचा आणि युवकांचा सक्रिय सहभाग वाढविण्यासाठी विशेष सत्रांचे आयोजन करण्यात येणार असल्याची माहिती देण्यात आली.
सभागृह नेते प्रशांत शितोळे आणि विरोधी पक्षनेते भाऊसाहेब भोईर यांनीही फुले-आंबेडकर विचारांचा वारसा पुढे नेण्यासाठी सर्वतोपरी सहकार्य करण्याची ग्वाही दिली. शहरातील सर्व घटकांना सहभागी करून विचारांची समता, बंधुता आणि न्यायाची तत्त्वे समाजमनात रुजविण्याचा निर्धार यावेळी व्यक्त करण्यात आला.
११ एप्रिल रोजी माता रमाई आंबेडकर स्मारकाचे भूमिपूजन
बैठकीदरम्यान दीर्घकाळ प्रलंबित असलेल्या त्यागमूर्ती रमाई भीमराव आंबेडकर स्मारकाच्या उभारणीबाबत सामाजिक कार्यकर्त्यांनी प्रश्न उपस्थित केला. माता रमाई यांच्या त्यागमय आणि प्रेरणादायी जीवनकार्याची दखल घेत स्मारक उभारणीस तातडीने सुरुवात करण्याची मागणी करण्यात आली.
यास प्रतिसाद देताना महापौर रवि लांडगे यांनी शहरातील नागरिकांच्या भावना लक्षात घेऊन येत्या ११ एप्रिल रोजी माता रमाई आंबेडकर स्मारकाचे भूमिपूजन करण्यात येणार असल्याची अधिकृत घोषणा केली. या घोषणेचे उपस्थितांनी टाळ्यांच्या कडकडाटात स्वागत केले. स्मारक उभारणीमुळे शहरातील भावी पिढ्यांना सामाजिक परिवर्तनाच्या इतिहासाची प्रेरणा मिळेल, असा विश्वास व्यक्त करण्यात आला.
विचार प्रबोधन पर्व आणि स्मारक उभारणी या माध्यमातून पिंपरी-चिंचवड शहर सामाजिक जागरूकता, समता आणि प्रगतीच्या दिशेने आणखी एक भक्कम पाऊल टाकत असल्याचे चित्र यावेळी स्पष्ट झाले.
