ब्रजभूमीत वसंत ऋतूच्या आगमनासोबतच होली २०२६ च्या भव्य आणि अनोख्या उत्सवाची जोरदार तयारी सुरू झाली आहे. वसंत पंचमीच्या दिवशी बरसाना आणि नंदगाव येथून होली उत्सवाची अधिकृत सुरुवात होणार असून, याच दिवसापासून ब्रजमधील सर्व मंदिरांमध्ये अबीर-गुलाल उधळत भक्ती आणि आनंदाचे वातावरण निर्माण होईल. यंदा तब्बल ४० दिवस चालणाऱ्या या रंगोत्सवात देश-विदेशातील लाखो भाविक आणि पर्यटक सहभागी होणार आहेत.
40 दिवसांचा रंगोत्सव, प्रत्येक दिवसाला वेगळी परंपरा
बरसाना-नंदगावची होली केवळ रंगांची उधळण नसून ती श्रीकृष्ण-राधेच्या लीला, भक्ती आणि लोकपरंपरेचा उत्सव आहे. या कालावधीत फुलों की होली, लड्डू होली, रंगभरनी होली, धुलेंडी, आणि सर्वांत प्रसिद्ध लठमार होली असे विविध पारंपरिक सोहळे साजरे केले जातात. प्रत्येक दिवशी वेगवेगळ्या मंदिरांमध्ये आणि गावांमध्ये उत्सवाचे वेगळे रंग पाहायला मिळतात.
लठमार होली – जगप्रसिद्ध परंपरेचा थरार
लठमार होली ही या उत्सवाची खास ओळख आहे. बरसाना येथे राधाराणीच्या सख्यांनी नंदगावातून आलेल्या कृष्णभक्तांवर लाठ्या उगारत रंगांची उधळण करतात, तर पुरुष ढालीच्या सहाय्याने स्वतःचा बचाव करत आनंदात सहभागी होतात. ही परंपरा पाहण्यासाठी दरवर्षी लाखो पर्यटक ब्रजमध्ये दाखल होतात. यंदाही लठमार होली पाहण्यासाठी विक्रमी गर्दी होण्याची शक्यता प्रशासनाने व्यक्त केली आहे.
श्रीकृष्ण जन्मभूमीत भक्तीचा संगम
होलीच्या ४० दिवसांत मथुरा, वृंदावन, बरसाना आणि नंदगाव या श्रीकृष्णाच्या जन्म व लीला स्थळांवर भक्तांची अलोट गर्दी दिसून येईल. मंदिरांमध्ये विशेष पूजा, भजन-कीर्तन, रासलीला आणि सांस्कृतिक कार्यक्रमांचे आयोजन करण्यात येणार आहे. या उत्सवामुळे ब्रज परिसरात धार्मिक पर्यटनालाही मोठी चालना मिळणार आहे.
प्रशासन सज्ज, सुरक्षा व सुविधा वाढवणार
लाखो भाविकांची गर्दी लक्षात घेता प्रशासनाकडून सुरक्षा, वाहतूक व्यवस्थापन, आरोग्य सुविधा आणि स्वच्छतेसाठी विशेष नियोजन करण्यात आले आहे. गर्दी नियंत्रण, सीसीटीव्ही देखरेख, स्वयंसेवकांची मदत आणि पर्यटकांसाठी मार्गदर्शन केंद्रे उभारण्यात येणार आहेत.
होली २०२६ च्या निमित्ताने ब्रजभूमी पुन्हा एकदा भक्ती, रंग आणि आनंदाच्या महासागरात न्हाऊन निघणार असून, हा उत्सव भारतीय संस्कृतीची जागतिक ओळख अधिक दृढ करणारा ठरणार आहे.
